საქართველოს ბიზნესომბუდსმენის განცხადებით, ადმინისტრაციული ორგანოები სასამართლოს გადაწყვეტილებების აღსრულებას აჭიანურებენ. მისი თქმით, სასამართლო გადაწყვეტილებების დროული და ეფექტური აღსრულება ჯანსაღი ბიზნესგარემოს განვითარების აუცილებელ წინაპირობაა.

გარდა ამისა, ბიზნესომბუდსმენი ამბობს, რომ ადმინისტრაციული ორგანოს მიერ საერთო სასამართლოების სისტემაში დადგენილი პრაქტიკის საწინააღმდეგო გადაწყვეტილების მიღება პირდაპირ უგულებელყოფს სასამართლოს მიდგომას და პოზიციას სადავო საკითხთან მიმართებით. მისი თქმით, ეს საგადასახადო ორგანოებისთვის იმთავითვე უპერსპექტივოს ხდის საკითხზე დავის წარმოებას და იწვევს მეწარმე სუბიექტების დროისა და ფულადი რესურსების დაუსაბუთებელ ხარჯვას.

ირაკლი ლექვინაძემ დღეს, 15 აპრილს აპარატის საქმიანობის სტატისტიკა წარადგინა და მიმართვიანობის ანალიზის მიხედვით ბიზნესის ინტერესების დაცვის მიმართულებით გამოკვეთილ კრიტიკულ საკითხებზე ისაუბრა.