გაიფიცე გარემოსთვის — რუსთაველის მეტროსთან ახალგაზრდებმა საპროტესტო აქცია გამართეს

15 აპრილს თბილისში სკოლის მოსწავლეებისა და სტუდენტების ნაწილი გაიფიცა. ისინი რუსთაველის მეტროსთან არიან შეკრებილები და გარემოსთან დაკავშირებულ პრობლემებზე საუბრობენ.

გაფიცვა 11 საათზე დაიწყო. აქციის ორგანიზატორების თქმით, დღეს ისინი უარს ამბობენ სასწავლებელში მისვლაზე, რადგნ სკოლისა და უნივერსიტეტის კედლები ვერ დაიცავს მათ "მომწამვლელი ჰაერისგან, ტყვიისგან, გახშირებული კატასტროფებისაგან და დამღუპველი პოლიტიკისგან".

“უფრო მეტს დროს ვატარებთ საცობში, ვიდრე სასწავლებლებში, გაკვეთილზე, ლექციაზე”, — ამბობენ ისინი.

მათ თან აქვთ პლაკატები წარწერებით: "ჩვენი ფილტვები თქვენს ნელ რეფორმებს ვერ დაუცდიან", "დრო გადის", "ბიზნეს ელიტა ჩვენი ჯანმრთელობით ვაჭრობს", "Tbilisi Polluted you", "მწვანე ავტობუსები არ ნიშნავს მწვანე პოლიტიკას".