ბათუმის საკრებულოში ნაციონალური მოძრაობისა და ქართული ოცნების დეპუტატები ერთმანეთს ფიზიკურად დაუპირისპირდნენ. რუსთავი 2-ის ინფორმაციით, სიტუაცია მას შემდეგ დაიძაბა რაც ენმ-ს წევრმა მირდატ ქამადაძემ უმრავლესობა ნეპოტიზმში დაადანაშაულა.

ქამადაძის თქმით, ბათუმის წყალში, სანდასუფთავებასა და სხვა დაწესებულებებში ხელმძღვანელი პირების ნათესავები არიან დასაქმებულები. არაერთი მოთხოვნის მიუხედავად, მუნიციპალიტეტის მიერ დაფუძნებული ორგანიზაციები საჯარო ინფორმაციას არ აწვდიან.

ოპოზიციური პარტიები ითხოვდნენ დასაქმებულთა სიების გადაცემას. ქართული ოცნების წევრმა მათ ბათუმის საქალაქო სასამართლოს გადაწყვეტილება აჩვენა და თქვა, რომ არ არიან ვალდებულები ბათუმის წყალში დასაქმებულების სახელობითი სია წარმოადგინონ და პირადი ინფორმაცია გაასაჯაროონ.