მოძრაობა - სახელმწიფო ხალხისთვის ლიდერი, პაატა ბურჭულაძე ზეწოლის შესაძლო ფაქტებზე სასაუბროდ არასამთავრობო ორგანიზაციებისა და დიპლომატიური კორპუსის წარმომადგენლებს ხვდება.

შეხვედრამდე ბურჭულაძემ განაცხადა, რომ დღეს, სავარაუდოდ, კიდევ იქნება ერთი ზეწოლის ფაქტი და ამაში ის ხელისუფლებას ადანაშაულებს:

"დღეს იქნება ბოლო ზეწოლა და ამით მორჩება, რადგან უკვე ახალგაზრდულიც წამოაყენეს. არის ზეწოლა ყველაზე, აი, ნახავთ თქვენ 12 საათზე რა იქნება. დილით გავიგე მე, რადგან იციან, რომ პრესკონფერენციას ვაკეთებ. აუცილებელია, ხალხი მოვიდეს ჭკუაზე, აირჩიო ის მთავრობა, რომელიც მას გამოადგება. დღევანდელი მთავრობა ღუპავს საქართველოს. მე ზუსტად მაგიტომ შემოვედი პოლიტიკაში, ეს მინდა მე ვთქვა. დღევანდელი მთავრობა არის მარიონეტული და ღუპავს მთელ საქართველოს".

14 სექტემბერს, ნიკა გვარამიასა და პაატა ბურჭულაძეს შორის სატელეფონო საუბრის აუდიო ჩანაწერი გავრცელდა. ჩანაწერი ატვირთულია YouTube-ზე, georgia-news.org-ის სახელწოდებით გახსნილ არხზე, რუსული სათაურით: ნიკა გვარამია აკონტროლებს "დამოუკიდებელ" პოლიტიკოსებს (Ника Гварамия контролирует "независимых" политиков).

გვარამია აცხადებს, რომ ნამდვილად ღია ხაზზე ესაუბრა პარტია სახელმწიფო ხალხისთვის ლიდერს პაატა ბურჭულაძეს, რადგან დასამალი არაფერი ჰქონდა. ის თავისი სატელეფონო ჩანაწერის გავრცელებაში სახელმწიფო უსაფრთხოების სამსახურს ადანაშაულებს.

დღეს კი ბურჭულაძემ განაცხადა, რომ ზეწოლის სხვა ფაქტებთან დაკავშირებითაც გაასაჯაროვებს ინფორმაციას.