მართლმადიდებელი ეკლესიის საპატრიარქომ On.ge-ს კიდევ ერთხელ განუცხადა, რომ მთაწმინდის მაჟორიტარი დეპუტატის, გიორგი ანდრიაძის კატაკომბური ეკლესიის ორგანიზაციას მხარს არ უჭერს და ემიჯნება.

10 აპრილის პრესკონფერენციაზე გიორგი ანდრიაძე საპატრიარქოს განცხადებას გამოეხმაურა, რომლითაც საპატრიარქო გირჩის საპირწონედ შექმნილ მართლმადიდებელ კატაკომბურ ეკლესიას გაემიჯნა. მისი თქმით, აღნიშნული განცხადებით საპატრიარქო მას კია არ გაემიჯნა, პირიქით, მხარი დაუჭირა.

"ისინი ემიჯნებიან ჩემი ბრძოლის პოლიტიკურ მეთოდს, რომელიც არის ხელისუფლებაზე ზეწოლა. იმ განცხადებაში წერია, რომ უნდა დაიხვეწოს ჯარში გაწვევის სისტემა, გირჩის ორგანიზაცია უნდა გაუქმდეს. რასაც მოვითხოვ, იმას მოითხოვენ ისინი. ემიჯნებიან ჩემი ზეწოლის მეთოდს", — განმარტა გიორგი ანდრიაძემ.

პირველ აპრილს გიორგი ანდრიაძემ განაცხადა, რომ გირჩის ალტერნატივად მართლმადიდებლური ორგანიზაცია შეიქმნა, რომელიც ახალგაზრდებს ჯარისგან გაათავისუფლებს. მისი განმარტებით, ეს ორგანიზაცია თურქეთში არსებულ, ისტორიულად ჩამოყალიბებულ კატაკომბურ ეკლესიას წარმოადგენს, რომელიც თავისი მრწამსით მართლმადიდებლური ორგანიზაციაა.

აღნიშნულთან დაკავშირებით საპატრიარქომ განაცხადა, რომ გიორგი ანდრიაძემ განუმარტა მათ, რომ ეს მისი პოლიტიკური ხედვაა და არაა მათთან დაკავშირებული.