იტალიის მე-10 პრეზიდენტი და 49-ე პრემიერმინისტრი კარლო აძელიო ჩამპი 95 წლის ასაკში გარდაიცვალა. მან გადამწყვეტი როლი ითამაშა 2002 წელს იტალიის მიერ ევროს ოფიციალურ ვალუტად მიღებაში.

ჩამპი იტალიის პრეზიდენტი 1999-2006 წლებში იყო. გარდიანის ინფორმაციით, თავის ქვეყანაში ის ძალიან პოპულარული იყო, რის გამოც ჩამპის მეორედაც შესთავაზეს პრეზიდენტობა, თუმცა მან ეს წინადადება ასაკის გამო უარყო.

კარლო აძელიო ჩამპი პროფესიით ეკონომისტი იყო, ის 14 წლის განმავლობაში ბანკში მუშაობდა.

"ის იტალიას სიყვარულით ემსახურებოდა" - განაცხადა იტალიის პრემიერმინისტრმა.

იტალიის მედიის ცნობით, ქვეყნის ყოფილმა პრეზიდენტმა თავისი სიცოცხლის ბოლო დღეები რომში, საავადმყოფოში, გაატარა.

საქართველოს პრეზიდენტმა გიორგი მარგველაშვილმა იტალიელ კოლეგას სერჯო მატარელას სამძიმრის წერილი გაუგზავნა და მწუხარება გამოხატა კარლო აძელიო ჩამპის გარდაცვალების გამო.