საქართველოს მესამე პრეზიდენტის, მიხეილ სააკაშვილის თქმით, ტერიტორიული მთლიანობის აღსადგენად მზად იყო, NATO-ში გაწევრიანებაზე უარი ეთქვა. გადაცემა კვირის აქცენტებში ნიკა გვარამია ახალი დოკუმენტური ფილმიდან სააკაშვილის ციტატა წაიკითხა:

"თუ ტერიტორიებს მოგვცემთ ყველაფერზე უარს ვამბობთ, მათ შორის, NATO-ზეც კი. 2008 წლის დასაწყისში პირდაპირ ვუთხარი, NATO-ზეც უარს ვამბობ, ტერიტორიები დაგვიბრუნეთ, დავამყაროთ მშვიდობა".

გადაცემაში მიხეილ სააკაშვილმა აღნიშნა, რომ რუსების "გაყრა" ქვეყნიდან შეუძლებელი იყო და მსგავსი წინადადება ამიტომაც წამოაყენა.

"ჩემთვის ჩემი ქვეყანაა მთავარი... ჩვენ მივიღეთ ის მემკვიდრეობა, რომელიც მივიღეთ", — განაცხადა სააკაშვილმა.