თბილისის მერიის ორწლიანი საქმიანობის ანგარიშის პრეზენტაციაზე, დავით ნარმანიამ განაცხადა, რომ მომსახურების გაუმჯობესების მიზნით, მერია დასუფთავების მანქანების პარკის სრულად განახლებას აპირებს.

მერიის ცნობით, დასუფთავების კუთხით, თბილისს ამ დროისთვის 291 ერთეული სპეციალური ტექნიკა ემსახურება, აქედან 28 ერთეული თბილსერვის ჯგუფმა 2016 წელს შეიძინა.

ანგარიშის მიხედვით, შპს თბილსერვის ჯგუფმა დედაქალაქის მასშტაბით, 10 050 ცალი ახალი ნაგავშემკრები კონტეინერი განათავსა. დღეის მდგომარეობით, თბილისში სულ განთავსებულია 18 974 ნაგავშემკრები კონტეინერი.

ნარმანიას განცხადებით, ქალაქში პირველად მოეწყო ინერტული (სამშენებლო) ნარჩენების 2 ნაგავსაყრელი, რაც მანამდე არასდროს ყოფილა.

"თბილსერვის ჯგუფმა 2016 წლის აგვისტოში სამშენებლო სამუშაოები დაიწყო, რომლის დასრულების შემდეგაც, სუნის პრობლემა, რომელიც ნორიოს დასახლებაში მცხოვრებ მოსახლეობას აწუხებდა, აღმოიფხვრება. პროექტის საერთო ღირებულება 8 მლნ ლარამდეა და სამშენებლო სამუშაოები გაწერილია 11 თვეზე".

თბილისის მერის თქმით, განათების ქსელი მოეწყო იმ უბნებში, სადაც გარე განათება ამ დრომდე არ არსებობდა. მათ შორის, ავჭალაში, დიდ დიღომში, ივერთუბანში და ა.შ.

თბილისის მერიის დაკვეთით, თბილსერვის ჯგუფმა თბილისის ანძის განათების ახალი პროექტიც შეიმუშავა:

"დამონტაჟებული LED-სანათები საშუალებას გვაძლევს ანძა სხვადასხვა ფერში გავანათოთ. 15-მდე ობიექტზე დამონტაჟდა მხატვრული მინათება, რაც დედაქალაქის მცხოვრებლებისათვის და მისი სტუმრებისთვის ღამის თბილისში გასეირნებას კიდევ უფრო სასიამოვნოს ხდის".

ნარმანიამ ისაუბრა გამწვანების მიმართულებით განხორციელებულ ღონისძიებებზე და აღნიშნა, რომ საანგარიშო პერიოდში მოეწყო 82 ახალი სკვერი და რეაბილიტაცია ჩაუტარდა 343-ს. 2014-16 წლების განმავლობაში, დედაქალაქის მასშტაბით, დარგულია 560 000-მდე ხე-მცენარე. 75 მისამართზე განხორციელდა სარწყავი ქსელის რეაბილიტაცია.

ამასთან, დავით ნარმანიას განცხადებით, სხვადასხვა ტერიტორიაზე განხორციელდა 10 გამწვანებული ობიექტის სრული რეაბილიტაცია, ასევე, დენდროლოგიური, ინფრასტრუქტურული და საჭიროებიდან გამომდინარე, სხვადასხვა სახის სამუშაოები.