საქართველოს ტერიტორიულ წყლებში ნატოს მუდმივმოქმედი მეორე საზღვაო შენაერთი — SNMG2 შემოვიდა. შინაგან საქმეთა სამინისტროს ცნობით, ისინი საქართველოს სანაპირო დაცვის ორ ხომალდთან ("დიოსკურია" და "ოჩამჩირე") ერთად ერთობლივ წვრთნებს ჩაატარებენ. წვრთნების მიზანია საქართველოს და ნატოს საზღვაო ძალების ურთიერთქმედებისა და ურთიერთთავსებადობის ამაღლება.

ნატოს საზღვაო შენაერთს კომოდორი ბაუდევაინ ბუთსი ხელმძღვანელობს. ვიზიტის ფარგლებში, კომოდორი საქართველოს სანაპირო დაცვის ხელმძღვანელს შეხვდება. მეორე საზღვაო შენაერთის შემადგენლობაში შედის: საფლაგმანო ხომალდი "HNLMS Evertsen" (ნიდერლანდების სამეფო), "TCG Yildirim" (თურქეთის რესპუბლიკა), "BGS DRAZKI" (ბულგარეთი) და "ROS Regele Ferdinand" (რუმინეთი).

ნატოს მუდმივმოქმედი მეორე საზღვაო შენაერთის (SNMG2) ხომალდები საქართველოს ტერიტორიულ წყლებს 4 აპრილს დატოვებენ.