საქართველოს პარლამენტის ადამიანის უფლებების კომიტეტის თავმჯდომარე, სოფო კილაძე, ფეისბუქის გვერდზე განცხადებას ავრცელებს და წერს, რომ ხატია ახალაიას ონლაინ-გაკვეთილებმა სქესოვრივ აღზრდაზე, სამართლიანად აღაშფოთა საზოგადოება.

"დღეს ბავშვები დაუცველები არიან ამ კუთხით, რისი კარგი მაგალითი იყო ხატია ახალაიას ცნობილი ონლაინ გაკვეთილები, რომელმაც სამართლიანად გამოიწვია აღშფოთება საზოგადოებაში. ჩვენ არ გვინდა ასეთი რამის განმეორება. მე მესმის, რომ ოპოზიციურად განწყობილი მედიის ინტერესში ხელისუფლების დისკრედიტაციაა, მაგრამ ასეთი უღირსი მეთოდების გამოყენება ვფიქრობ, მიუღებელია". — წერს სოფო კილაძე.

კილაძის განცხადებით, ბავშვის უფლებათა კოდექსი არ აკანონებს სქესობრივი აღზრდის გაკვეთილებს სკოლებში, არამედ, სქესობრივი აღზრდის განათლება შესაძლებელია მხოლოდ მშობლის თანხმობით. მისივე თქმით, "თუ რომელიმე ენჯეომ ან ექსპერტმა" გადაწყვიტა, არაფორმალური განათლების ფარგლებში შეიტანოს ასეთი ტიპის გაკვეთილები, ამის საშუალება მშობლის ფილტრის გარეშე არ ექნებათ.

სექსუალურ განათლებაზე ვიდეოგაკვეთილების მომზადების შემდეგ ხატია ახალაის ემუქრებოდნენ. მისი თქმით, გაკვეთილები ბავშვების ცნობიერების ამაღლებას ემსახურება, რათა მათ ინფორმაცია დამახინჯებული გზებით არ მიიღონ. როგორც ხატია ახალაია ამბობს, მას ფიზიკური გასწორებითა და გაუპატიურებით ემუქრებოდნენ. გარდა ამისა, ემუქრებოდნენ მის ოჯახსა და შვილებს. ამ საქმეზე შინაგან საქმეთა სამინისტროში გამოძიება დაიწყო.