29 მარტი ნასას ორი ასტრონავტისთვისა და მსოფლიოსთვის ისტორიული უნდა ყოფილიყო. ამ დღეს ღია კოსმოსში მხოლოდ ქალებისგან შემდგარი მისიის გასვლა იგეგმებოდა, თუმცა, შესაბამისი ზომის სკაფანდრების არარსებობის გამო კოხს კომპანიონობას მამაკაცი კოლეგა, ნიკ ჰაგი გაუწევს.

ნასამ ორშაბათს განაცხადა, რომ მხოლოდ ერთი საშუალო ზომის სკაფანდრი იყო ხელმისაწვდომი. მოგვიანებით კი განმარტა, რომ "ერთზე მეტი სკაფანდრი არსებობს, მაგრამ იმისთვის, რომ გეგმას არ ჩამორჩნენ, ასტრონავტების გადანაცვლება უფრო ადვილია, ვიდრე სკაფანდრების გადაკეთება".

როგორც ნასას წარმომადგენელმა, სტეფანი შირჰოლცმა განაცხადა, მაკკლეინი M და L ზომის სკაფანდრებში ვარჯიშობდა და ფიქრობდა, რომ დიდი ზომის სკაფანდრში თავს კომფორტულად იგრძნობდა, თუმცა ბოლო ცდების დროს აღმოაჩინა, რომ მას საშუალო ზომა უკეთესად ერგება.

ისტორიული მისიის გადადების შესახებ ინფორმაციამ სოციალურ ქსელებში უკმაყოფილება გამოიწვია.

პირველი ქალი, რომელიც ღია კოსმოსში გავიდა, საბჭოთა კოსმონავტი სვეტლანა სავიცკაია იყო (ვალენტინა ტერეშკოვას ხომალდი არ დაუტოვებია). მას შემდეგ 500-ზე მეტი ადამიანი იმყოფებოდა მისიებზე, თუმცა მათგან მხოლოდ 11% იყო ქალი.

მაკლეინი და კოხი ნასას 2013 წლის თაობის წარმომადგენლები არიან, რომელიც ქალებითა და კაცებით თანაბრად იყო დაკომპლექტებული.