გასულ წელს კინოინდუსტრიაში ერთ-ერთი ყველაზე ცხელი თემა რეჟისორ სტივენ სპილბერგისა და ნეტფლიქსის დაპირისპირება იყო.

ნეტფლიქსის გარდა, სტივენმა ყველა სტრიმინგ-სერვისის წინააღმდეგ გაილაშქრა და თქვა, რომ ასეთი კომპანიის ფილმები ოსკარის ნომინაციებს არ უნდა იღებდნენ.

"ტელევიზიისთვის გადაღებული ფილმები მხოლოდ და მხოლოდ სატელევიზიო ფილმებად უნდა მოიხსენიებოდნენ და ემისთვის იბრძოდნენ", - ამბობდა რეჟისორი.

გარდა ამისა, სპილბერგი ამბობდა, რომ ისეთი სტრიმინგ-სერვისების გამოჩენამ, როგორებიცაა ამაზონი და ნეტფლიქსი, კინოსგან მიღებულ სიამოვნება მოკლეს, რაც გამოიხატება იმით, რომ ამა თუ იმ პროდუქციის სანახავად ადამიანები კინოთეატრებში აღარ დადიან.

რეჟისორს მკაცრად ჰქონდა გადაწყვეტილი, რომ ამერიკის კინოაკადემიის შეხვედრაზე წამოეყენებინა იდეა, რომლის მიხედვითაც სტრიმინგ-სერვისებს საოსკარე სეზონში მონაწილეობა აეკრძალებათ.

"მათ წესები უნდა შეცვალონ და საკუთარი პროდუქციის კინოთეატრებში გაუშვან", - ამბობდა რეჟისორი.

სპილბერგი ამბობდა, რომ სერიალების ასეთი მასობრივი წარმოება, ნელ-ნელა ბოლოს უღებდა კინოს იდეას და ამაში მთავარ დამნაშავედ ნეტფლიქსს ასახელებდა.

რეჟისორის ამ ხისტ დამოკიდებულებას მალევე გამოეხმაურა ნეტფლიქსი და განცხადებაც გაავრცელა, რომელშიც ვკითხულობთ:

"ჩვენ გვიყვარს კინო და გთავაზობთ იმას, რაც ასევე ძალიან გვიყვარს: ხელმისაწვდომობა იმ ხალხთან, რომელთაც ყოველთვის არ აქვთ შესაძლებლობა კინოთეატრში წასვლის, ან ცხოვრობენ ისეთ ქალაქებში, სადაც კინოთეატრები არ არის. ჩვენი სურვილია მივცეთ ნება ყველას და ყველგან, ერთდროულად ნახონ ახალი პროდუქცია. მივცეთ რეჟისორებს სხვა გზებიც თავიანთი ხელოვნების გასავრცელებლად. ეს ყველაფერი კი ურთიერთგამომრიცხავი ნამდვილად არ არის".

ამ ხანგრძლივი დაპირისპირების ფონზე, ყველაფერი კიდევ უფრო საინტერესო გახდა მას შემდეგ, რაც გუშინ ეფლმა საკუთარი სტრიმინგ-სერვისი Apple TV+ წარადგინა.

სტრიმინგ სერვისი აერთიანებს როგორც სერიალებსა და ფილმებს, ასევე დოკუმენტურ გადაცემებს, სატელევიზიო თოქ-შოუებსა და სხვა ტიპის გასართობ კონტენტს.

ეფლის სტრიმინგ-სერვისი ჰოლივუდის A კლასის წარმომადგენლებით არის დაკომპლექტებული, მათ შორის კი რაოდენ გასაკვირიც არ უნდა იყოს არის სტრიმინგ-სერვისების "მტერი" მისი აღმატებულება სტივენ სპილბერგიც, რომელსაც არხზე საკუთარი სერიალი ექნება.

როგორც ცნობილია, სპილბერგი ეფლის დაკვეთით ფილმის გადაღებასაც აპირებს და საინტერესოა, ამ ფილმს თუ ჩათვლის ისეთი ხარისხის პროდუქტად, რომელმაც საოსკარე სეზონში უნდა მიიღოს მონაწილეობა?!

ჩვენ ისღა დაგვრჩენია, დაველოდოთ, რა სერიალით წარდგება მაყურებლის წინაშე სპილბერგი და შეიცვლის თუ არა დამოკიდებულებას ის სტრიმინგ-სერვისებთან დაკავშირებით.

ამავე თემაზე: