ევროპული საქართველო ეროვნული ბანკის პრეზიდენტს კობა გვენეტაძეს რეგლამენტის დარღვევაში ადანაშაულებს და საპროცედურო საკითხთა კომიტეტის თავმჯდომარეს, გაგა კახიანს რეაგირებისკენ მოუწოდებენ. ევროპული საქართველოს დეპუტატის, ირმა ნადირაშვილის თქმით, მათ სამკვირაზე მეტია გააგზავნეს წერილი საფინანსო საბიუჯეტო კომიტეტში თიბისი ბანკის საქმეზე კობა გვენეტაძის პარლამენტში დაბარებასთან დაკავშირებით. თუმცა სებ-ის პრეზიდენტს პარლამენტში მისვლის თარიღი ამ დრომდე არ დაუსახელებია.

"გავიდა სამ კვირაზე მეტი, ჩვენთვის ცნობილია, რომ ბატონმა კომიტეტის თავმჯდომარემ ეს წერილი გადააგზავნა, მაგრამ გვენეტაძემ ვერ გადაწყვიტა და ვერ შეატყობინა პარლამენტს თარიღი, როდის შეძლებს ის აქ მოსვლას და დეპუტატის შეკითხვებზე პასუხის გაცემას", — განაცხადა ირმა ნადირაშვილმა.

მისივე თქმით, ევროპულმა საქართველომ უკვე მოითხოვა კობა გვენეტაძის მისვლა ეკონომიკურ კომიტეტზე, სადაც ბანკის რეგულაციებთან დასმულ კითხვებს უნდა უპასუხოს. ნადირაშვილის განმარტებით, კობა გვენეტაძემ გამოთქვა მზაობა, რომ ამ საკითხზე კვარტლის დასრულების შემდეგ ისაუბრებდა.

"თუ გვენეტაძე ჯერ კიდევ ვერ მიხვდა რამხელა შარში გაგვხვია მთელი ქვეყანა, როგორ ემუქრება მისი რეგულაციები ბიზნესს, ადამიანებს აკარგვინებს სამუშაო ადგილებს", — განაცხადა ნადირაშვილმა.

On.ge ამ საკითხზე ეროვნული ბანკის პრესსამსახურთან დაკავშირებას ცდილობს.