დღეს, 4 საათზე უშიშროების საბჭოს სხდომა გაიმართება. როგორც უშიშროების საბჭოს აპარატის საზოგადოებასთან ურთიერთობის სამსახურის ხელმძღვანელმა, გოგი ახალკაცმა განმარტა, სხდომის ფარგლებში სამხედრო ძალების რაოდენობის განსაზღვრასა და თავდაცვის სამინისტროს რეფორმირებაზე იმსჯელებენ.

თავდაცვის მინისტრის, ლევან იზორიას განმარტებით კი, სხდომაზე ერთ-ერთი მთავარი განსახილველი საკითხი უწყების მიერ შემუშავებული სტრატეგია იქნება:

"ერთ-ერთი თემა იქნება ის სტრატეგია და სტრატეგიის ის ძირითადი მიმართულებები, რომელიც თავდაცვის სამინისტრომ ბოლო 1 თვის განმავლობაში შეიმუშავა. შესაბამისად, უშიშროების საბჭოს სხდომის ფარგლებში, მე ამაზე აქამდეც მქონდა განცხადება გაკეთებული, ამ სტრატეგიისა და მიმართულებების განხილვა".

სხდომის მთავარი მომხსენებლები თავდაცვის მინისტრი და გენერალური შტაბის უფროსი, სხდომის მდივანი კი ირინა იმერლიშვილი იქნება.

იმერლიშვილი რამდენიმე დღის წინ პრეზიდენტმა მარგველაშვილმა საკონსტიტუციო სასამართლოს მოსამართლედ დანიშნა, თუმცა, ოქტომბრის დასაწყისამდე ის უშიშროების საბჭოს მდივნის თანამდებობას ისევ შეასრულებს.