საქართველოს პროკურატურის ინფორმაციით, დააკავეს პირი, რომელის სამსახურეობრივი გულგრილობის გამო გარემოს 243 980 ლარის ოდენობის ზიანი მიადგა. საუბარია იმერეთის სატყეო სამსახურის ხონის სატყეო უბნის ტყისმცველზე.

"მას შემდეგ, რაც ბრალდებულისთვის ცნობილი გახდა მის სამოქმედო ტერიტორიაზე განხორციელებული უკანონო ჭრის ფაქტი, მისი ქმედების შედეგად გამოწვეული ზიანის მასშტაბების შემცირებისა და მოსალოდნელი პასუხისმგებლობისთვის თავის არიდების მიზნით, დაიყოლია რამდენიმე ნაცნობი, სოციალურად დაუცველი პირი და მათ მიმართ შეადგინა ყალბი ადმინისტრაციულ სამართალდარღვევათა ოქმები", — აღნიშნულია პროკურატურის მიერ გავრცელებულ განცხადებაში.

დაკავებულს ბრალი სისხლის სამართლის კოდექსის 341-ე და 342 მუხლის პირველი ნაწილით აქვს წაყენებული. ამ მუხლებით ორიდან ოთხ წლამდე პატიმრობაა გათვალისწინებული.