პარტია ქართული ოცნების ყოფილ დეპუტატს, ზვიად კვაჭანტირაძეს უჩნდება განცდა, რომ ანაკლიის პორტის პროექტის განსახორციელებლად საქმე ძირეული ცვლილებებისკენ მიდის. ამის შესახებ ზვიად კვაჭანტირაძემ პარლამენტში რეგიონული განვითარებისა და ინფრასტრუქტურის მინისტრის, მაია ცქიტიშვილის მოხსენების შემდეგ განაცხადა. მაია ცქიტიშვილი საქართველოს პარლამენტში ანაკლიის ღრმაწყლოვანი პორტის პროექტის შესახებ დეპუტატების კითხვებს პასუხობს.

ზვიად კვაჭანტირაძის თქმით, მინისტრის გამოსვლის შემდეგ გაუჩნდა კითხვები, რომელიც ამ დრომდე არ ჰქონდა.

"ჩემი კოლეგების შეკითხვებიდან გამომდინარე მიჩნდება განწყობა, რომ ანაკლიის პროექტის განსახორციელებლად საქმე ძირეული ცვლილებებისკენ მიგვყავს. კონკრეტულად არსებული კონსორციუმის კომპეტენცია და მისი შესაძლებლობები დგება ეჭვის ქვეშ, რასაც მე ვუყურებ", — განაცხადა ზვიად კვაჭანტირაძემ.

მისი თქმით, ამ პროექტს საერთაშორისო დონეზე ეწინააღმდეგებიან, მათ შორის რუსეთიც.

"უპირველეს ყოვლისა, ეს არის რუსეთის ინტერესების საწინააღმდეგო ნაბიჯი და რუსები მიიიჩნევენ ანაკლიის პორტს ერთ-ერთ ყველაზე საშიშ პროექტად, რომელიც ჩვენს რეგიონში შეიძლება განხორციელდეს, ამაზე ხმამაღლა საუბრის რატო გვერიდება? ეს ჩვენ დაგვიცავს, ამაზე ხმამაღლა უნდა ვისაუბროთ", — განაცხადა ზვიად კვაჭანტირაძემ.

საქარველოს პარლამენტში ანაკლიის პორტის პროექტზე სასაუბროდ რეგიონული განვითარებისა და ინფრასტრუქტურის მინისტრი, მაია ცქიტიშვილი თავისი სურვილით მივიდა. მინისტრის თქმით, მიმდინარეობს არასწორი საზოგადოებრივი აზრის შექმნა, რომ ანაკლიის პორტის საკითხი უკავშირდება კონსორციუმის ცალკეული დამფუძნებლების მიმართ გაჩენილ კითხვას და თითქოს ანაკლიის პორტის აშენებით, საქართველოს მთავრობა არ არის დაინტერესებული.

"აქედან გამომდინარე, ვისარგებლე ჩემი უფლებით, მიმემართა საქართველოს პარლამენტისთვის თხოვნით ამ თემასთან დაკავშირებით მოსმენის თაობაზე. მადლობელი ვარ, რომ თქვენ ეს თხოვნა გაითვალისწინეთ. ვეცდები ყველა თქვენს შეკითხვას გავცე პასუხი და ერთად ამოვწუროთ ეს საკითხი", — მიმართა მაია ცქიტიშვილმა დეპუტატებს.