აფრიკის სამხრეთ ნაწილს ტროპიკული ციკლონი იდაი დაატყდა თავს. წითელი ჯვრის ინფორმაციით, სტიქიის შედეგების მასშტაბური და შემზარავია. მათივე თქმით, მოზამბიკში, ზიმბაბვესა და მალავიში 1,5 მილიონზე მეტი ადამიანი დაზარალდა, ხოლო ასობით უგზო-უკვლოდ დაიკარგა. დაზარალებულთა და გარდაცვლილთა რიცხვი ამ დროისთვის უცნობია, რადგან რეგიონების დიდი ნაწილი მოწყვეტილია და მათთან მისვლა შეუძლებელია.

სტატისტიკის მიხედვით, მოზამბიკში 84 ადამიანი გარდაიცვალა, თუმცა პრეზიდენტი, ფილიპე ნიუსი ამბობს, რომ სტიქიას ათასობით სიცოცხლე შეეწირა. მისივე თქმით, შედეგები კატასტროფულია. ყველაზე მეტად დაზარალდა ქალაქი ბეირა, სადაც ციკლონის გამო მეწყერი წარმოიქმნა და რამდენიმე დღის განმავლობაში მათ დასახმარებლად ვერავინ მიდიოდა.

ზიმბაბვეში ციკლონის შედეგად 98 ადამიანი გარდაიცვალა, ხოლო 217 უგზო-უკვლოდ დაკარგულად მიიჩნევა. დიდი ზარალია მალავიშიც, სადაც ძლიერი წვიმების გამო 122 ადამიანი დაიღუპა.

ფოტო: IFRC

ფოტო: AFP