ნაციონალური მოძრაობის პოლიტსაბჭოს სხდომის შემდეგ, რომან გოცირიძემ განაცხადა, რომ პარტიის თავმჯდომარეობისთვის გრიგოლ ვაშაძის კანდიდატურა გამოიკვეთა და ყრილობაზე მას დაუჭერენ მხარს. ყრილობა 24 მარტს ჩატარდება.

"ბუნებრივმა პროცესმა გვიკარნახა, თუ ვინ უნდა იყოს პარტიის თავმჯდომარე... სწორედ ამ მრავალწლიანი მუშაობისა და ბრძოლის შემდეგ ბატონმა გრიგოლმა დაამტკიცა, რომ მას მხარს უჭერს ოპოზიციის ელექტორატის თითქმის აბსოლუტური უმრავლესობა. ეს აჩვენებს, რომ ის არის პარტიის ახალი ლიდერი, რომელსაც შესძლევს მომავალ ბრძოლებში გაუძღვეს პარტიას", — აღნიშნა გოცირიძემ ჟურნალისტებთან.

გოცირიძეს თქმით, პოლიტსაბჭოს სხდომაზე დაგეგმილი ყრილობის ორგანიზებასა და შუალედურ არჩევნებში მონაწილეობაზე იმსჯელეს. მან განმარტა, როგორ აპირებენ შუალედურ არჩევნებში მონაწილეობას ჯერ გადაწყვეტილი არ აქვთ.

დღეს, 18 მარტს ექსპრეზიდენტმა, მიხეილ სააკაშვილმა ვიდეომიმართვაში განაცხადა, რომ პარტიას თავმჯდომარე სჭირდება. ამ პოსტზე კი ის გრიგოლ ვაშაძის კანდიდატურას უჭერს მხარს.

"ჩვენ უნდა ვიყოთ მუდმივად მოქნილები და ვაკეთოთ ისეთი რამე, რაც არ შეაჩერებს არც ერთი დღით ჩვენს ბრძოლას. ამიტომ ამ სიტუაციაში ჩემი აზრით, მნიშვნელოვანია ნაციონალური მოძრაობის თავმჯდომარის არჩევა. იმიტომ, რომ ნაციონალურ მოძრაობას სჭირდება ადგილზე ლიდერი, რომელიც ამ დროშას აიტაცებს თქვენთან ერთად", — განაცხადა მიხეილ სააკაშვილმა.