ინგოროყვას კლინიკის რეანიმატოლოგის, თინათინ ხუჭუას ინფორმაციით, ორთაჭალაში მშენებლობიდან გადმოვარდნილი მესამე მუშის ჯანმრთელობის მდგომარეობა უკიდურესად მძიმეა.

მისი ინფორმაციით, დაშავებული კაცი რეანიმაციულ განყოფილებაში, მართვით სუნთქვაზე იმყოფება და ჯერჯერობით, რაიმე ოპერაციული ჩარევა არ სჭირდება.

"მას აღენიშნება პოლიტრავმა, გულმკერდის დახურული ტრავმა, მუცლის ღრუს დახურული ტრავმა, ნეკნების მარჯვნივ მრავლობითი მოტეხილობაა, ტრავმულ-ჰემორაგიული შოკი და ანემია", — ამბობს ექიმი.

გუშინ, 16 მარტს, ორთაჭალაში მშენებარე კორპუსიდან სამი მუშა გადმოვარდა, მათგან ერთი ადგილზე, მეორე კი საავადმყოფოში გარდაიცვალა.

შინაგან საქმეთა სამინისტროში On.ge-ს უთხრეს, რომ მომხდარზე გამოძიება სისხლის სამართლის კოდექსის 240-ე მუხლით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.