რუსთავი 2-ის ადვოკატები უზენაეს სასამართლოს მიმართავენ, რომ მათი საკასაციო საჩივრის განხილვა ზეპირი მოსმენით მოხდეს. დღეს, 12 სექტემბერს, აღნიშნულის შესახებ ადვოკატებმა უზენაეს სასამართლოს შუამდგომლობა ჩააბარეს.

ადვოკატ თამთა მურადაშვილის თქმით, მაღალი საზოგადოებრივი ინტერესიდან გამომდინარე, მნიშვნელოვანია რომ მედიას ჰქონდეს პროცესთან წვდომა:

"ჩვენს არგუმენტაციაში მოყვანილი გვაქვს კანონმდებლობის შესაბამისი საფუძვლები და ახსნილი გვაქვს ის გარემოებები, თუ რამდენად მნიშვნელოვანია, რომ საზოგადოება იყოს ინფორმირებული და პროცესი იყოს გამჭვირვალე. ასევე მნიშვნელოვანია, არ იყოს პროცესი დახურული და ქონდეს პრესას და მედიას დასწრების საშუალება, რაც არის ადამიანის უფლებათა ევროპული კონვენციის მე-6 მუხლით გათვალისწინებული სამართლიანი სასამართლოს უფლება".

9 სექტემბერს, უზენაესმა სასამართლომ რუსთავი 2-ის საკასაციო საჩივარი განსახილველად დაუშვა.