სამხრეთ კალიფორნიაში არსებული ანზა-ბორეგოს უდაბნო უეცრად გაფერადდა. ნალექიანი ზამთრისა და სწრაფად მომატებული ტემპერატურების გამო სამხრეთ კალიფორნიაში არსებული ტერიტორიების დიდი ნაწილი "სუპერ აყვავებას" განიცდის.

აღნიშნული პროცესი ჯერ კიდევ დეკემბერში, უდაბნოში თეთრი შროშნების აყვავებით დაიწყო, ბოლო რამდენიმე კვირის განმავლობაში კი შროშნებს სხვა ფერადი ყვავილებიც შეემატნენ.

საინტერესო ისაა, რომ ველური ყვავილების უმეტესობას სქელი, ცვილის შემცველი თესლები აქვთ, რის გამოც მათ ნიადაგზე გადარჩენა წლების განმავლობაში შეუძლიათ, შემდეგ კი ისინი ხელსაყრელი პირობების გამოჩენისთანავე აყვავებას იწყებენ.

კალიფორნიის უნივერსიტეტის პროფესორის, რიჩარდ მინიხის თქმით, "სუპერ აყვავებების" დროს შესაძლოა ისეთ ყვავილებსაც წააწყდეთ, რომლებიც გადაშენებულად ითვლება.

სასიამოვნო ისაა, რომ ყვავილები უდაბნოში სხვა ორგანიზმებსაც იხმობენ, მაგალითად, პეპლებს.

როგორც წესი, ასეთი "სუპერ აყვავებები" თავს ყოველ ათ წელიწადში ერთხელ იჩენს, თუმცა ბოლო ორი წლის განმავლობაში ეს უკვე მეორე შემთხვევაა, როდესაც კალიფორნიის აღნიშნულ რეგიონში ყვავილები მასობრივად აყვავდა, ბოლო მსგავსი შემთხვევა 2017 წელს დაფიქსირდა. მაგრამ, აღნიშნული სანახაობა მაინც ძალიან იშვიათია, რადგან "სუპერ აყვავებები" ძალზედ სპეციფიკურ, კონკრეტულ გარემო პირობებს საჭიროებს.

ექსპერტები აცხადებენ, რომ ამინდის პროგნოზის გათვალისწინებით, მომდევნო დღეებისა და კვირების განმავლობაში სამხრეთ კალიფორნიის უდაბნო კიდევ უფრო ფერადი გახდება.

"წვიმა ზუსტად იდეალურ დროს მოვიდა. წარსულში მსგავსი აყვავებები მხოლოდ პატარა ტერიტორიებზე ხდებოდა, წელს კი, როგორც ჩანს, 80-კილომეტრიანი პარკის უმეტესი ნაწილი აყვავებული იქნება", - აცხადებს ანზა-ბორეგოს ეროვნული პარკის საგანმანათლებლო პროგრამების დირექტორი მაიკ მაკელჰატონი.