პრემიერ მინისტრმა, გიორგი კვირიკაშვილმა მთავრობის წევრებთან ერთად ქუთაისის საუნივერსიტეტო ქალაქის პრეზენტაცია გამართა.

ქუთაისის საუნივერსიტეტო ქალაქისა და თბილისის სამეცნიერო კვლევითი ცენტრის საერთო პროექტის ღირებულება 1 მილიარდი ევროა და მას მთლიანად ფონდი ქართუ დააფინანსებს.

კვირიკაშვილმა სიტყვით გამოსვლისას განაცხადა, რომ უნივერსიტეტისთვის შეირჩა ადგილი, სადაც არის ტყე, მდინარე, ტბა და 140 ჰა-ზე აშენდება 60 000 სტუდენტზე გათვლილი საუნივერსიტეტო ქალაქი:

"ყველაფერი გაკეთდება ისე, რომ ეს ულამაზესი ბუნება აბსოლუტურად შენარჩუნდება".

პრემიერის თქმით, შენობების საერთო ფართი 1 მილიონი მ2 იქნება, სადაც განთავსდება საგანმანათლებლო და სამეცნიერო სივრცეები, აუდიტორიები, ულტრათანამედროვე ტექნიკით აღჭურვილი ლაბორატორიები, საკონფერენციო დარბაზები, ბიბლიოთეკები, საერთო საცხოვრებლები სტუდენტებისთვის და პროფესორ მასწავლებლებისთვის.

გიორგი კვირიკაშვილმა საუნივერსიტეტო ქალაქში განსათავსებელი ობიექტების ვრცელი სია წარმოადგინა და თქვა, რომ მშენებლობისას გამოიყენებენ მაღალ ეკოლოგიურ სტანდარტებს, განახლებადი ენერგიების სისტემებსა და მწვანე ტექნოლოგიებს:

"აქ იქნება კინოთეატრები, დასასვენებელი კლუბები, კაფეები, სპორტული ინფრასტრუქტურა, ფეხბურთისა და რაგბის მოედნები, ჩოგბურთის კორტები, მინი ფეხბურთის მოედნები, კალათბურთის დარბაზი, საცურაო აუზი".

პრემიერის ცნობით, უნივერსიტეტის მთავარი პროფილი ტექნოლოგიური და ტექნიკური მეცნიერებები იქნება. სასწავლო მიმართულებები კი, დარგის ინჟინერია, ზუსტი და საბუნებისმეტყველო მეცნიერებები, კომპიუტერული ტექნოლოგიები, აგრომიმართულებები და სხვადასხვა დარგის მიჯნაზე მყოფი ინტერდისციპლინარული პროგრამები.

კვირიკაშვილმა ასევე აღნიშნა, რომ საუნივერსიტეტო ქალაქი ხელს შეუწყობს ადგილობრივების დასაქმებას, როგორც მშენებლობის პროცესში, ასევე მისი დასრულების შემდეგ.

პრემიერის ინფორმაციით, სტუდენტთა პირველი ნაკადის მიღება 2019 წელს იგეგმება.