თიბისი ბანკის დამფუძნებლის, მამუკა ხაზარაძის თქმით, ქვეყნის შიგნით და გარეთ ორი პოლიტიკური ლიდერის თავდასხმის ქვეშ არიან:

"თუ გინდათ, ამოიღეთ განცხადებები ჩემ მიმართ უცხოეთიდან და საქართველოდან. ჩვენ ამას მოთმინებით ვუძლებთ. ორი მილიონი კლიენტი გვყავს და წარმოვადგენთ სადეპოზიტო ბაზრის 40 პროცენტს. ამიტომ ჩვენგან რაღაცების გაცხადება და პასუხების გაცემა არ შეიძლება. მაგრამ ეს არ ნიშნავს, რომ ჩვენ უცხოეთიდან და შიგნიდანაც შეურაცხყოფას ვითმენთ ან მოვითმენთ", — აღნიშნა ხაზარაძემ პარლამენტში გამოსვლის დროს.

მამუკა ხაზარაძე თავის განცხადებაში, სავარაუდოდ, ბიძინა ივანიშვილსა და მიხეილ სააკაშვილს გულისხმობდა. მათ ბანკები არაერთხელ გაუკრიტიკებიათ.

მართველი პარტიის თავმჯდომარემ ბიძინა ივანიშვილმა სატელევიზიო ინტერვიუს დროს განაცხადა, რომ "ორმა ბანკმა გადაჭამა მთელი ქვეყანა".

ბანკების საქმიანობაზე თავის ვიდეომიმართვებში ბევრს საუბრობდა ყოფილი პრეზიდენტი მიხეილ სააკაშვილიც. ერთ-ერთი პირდაპირი ეთერის დროს მან აღნიშნა, რომ ქვეყანაში ბანკების არაპროფილური საქმიანობა უნდა აიკრძალოს და ამტკიცებდა, რომ დაბალი სოციალური ფონის პირობებში საქართველოს ბანკისა და თიბისი ბანკის დირექტორებმა რამდენიმე მილიონი დოლარის ოდენობის ხელფასი აიღეს.

დღეს, 4 მარტს პარლამენტში საფინანსო-საბიუჯეტო კომიტეტის სხდომაზე თიბისის დამფუძნებლებს, მამუკა ხაზარაძესა და ბადრი ჯაფარიძეს უსმენენ. ხაზარაძემ პარლამენტში მუქარასა და ზეწოლაზე ისაუბრა. მისი თქმით, არჩევნების წინ მუქარის წერილი შინაგან საქმეთა მინისტრისგან, გიორგი გახარიასგან მიიღო. გარდა ამისა, ის ამბობს, რომ ეროვნული ბანკის პრეზიდენტი და მისი მოადგილე აშანტაჟებდნენ. ის ორივე მათგანის პასუხისმგებლობის დაყენებას ითხოვს.