ზუგდიდის რაიონულმა სასამართლომ ბავშვისა და ცოლის ცემაში ბრალდებულს ექვსწლიანი პატიმრობა მიუსაჯა.

როგორც პროკურატურა ამბობს, ბრალდებულმა არასრულწლოვანი შვილების თანდასწრებით ცოლს ხელი რამდენჯერმე დაარტყა, რის შემდეგაც ქალი წაიქცა. მათივე თქმით, კაცმა ხელი დაარტყა არასრულწლოვან შვილსაც.

სამართალდამცავებმა კაცი შემთხვევიდან მეორე დღეს, 2018 წლის 31 იანვარს დააკავეს. მას ბრალდება სისხლის სამართლის კოდექსის 1261-ე მუხლის მეორე ნაწილის "ა", "ბ" და "გ" ქვეპუნქტებით (ოჯახის ერთი წევრის მიერ ოჯახის სხვა წევრის მიმართ ძალადობა, რამაც გამოიწვია ფიზიკური ტკივილი, ჩადენილი წინასწარი შეცნობით არასრულწლოვნის მიმართ, არასრულწლოვნის თანდასწრებით) წარედგინა და აღკვეთის ღონისძიების სახით პატიმრობა შეეფარდა.