თუ დამღლელი დღის შემდეგ შინ დაბრუნებულს ეკრანის წინ მოკალათება გიყვართ, მაშინ გეტყვით, რომ ღამის ეთერი 25 მარტიდან უფრო საინტერესო გახდება.

სხვა შუადღის წარმატებული პროექტის შემდეგ რუსთავი 2 ახალ გადაცემას, სხვა შუაღამეს იწყებს.

გადაცემა კვირაში 6-ჯერ, ორშაბათიდან შაბათის ჩათვლით გავა და 2 საათს გაგრძელდება.

არა ერთი, არა ორი, არამედ 12 წამყვანი

გადაცემის წამყვანების ვინაობა სიურპრიზია, თუმცა ცნობილია მათი რაოდენობა. სხვა შუაღამეს ჯამში 12 ერთმანეთისგან განსხვავებული მოდერატორი ეყოლება, რომლებიც თქვენთან ერთად განიხილავენ როგორც საქართველოს, ისე მსოფლიოს აქტუალურ თემებს.

როგორც On.ge-სთვის ცნობილია, წამყვანებს შორის არიან საკუთარ სფეროებში წარმატებული ადამიანები, თუმცა მათთან ერთად რუსთავი 2-ის მაყურებელი ახალგაზრდა პროფესიონალებსაც გაიცნობს.

გადაცემის გენერალური პროდიუსერის, გიორგი ლაფერაშვილის თქმით, "წამყვანებად შეირჩნენ ის ადამიანები, რომლებსაც საზოგადოებრივი აზრის ფორმირება შეუძლიათ. მათ აქვთ საინტერესო ხედვა სხვადასხვა პროცესებთან დაკავშირებით, არიან ენერგიულები და რაც მთავარია, აქვთ დიდი გამოცდილება თავიანთ საქმეში".

კონცეფცია

ფორმატი თავისი შინაარსით არც ერთ სხვა გადაცემას არ ჰგავს. ეს არაა რომელიმე უცხოური შოუს ქართული ვერსია.

სხვა შუაღამე პირველ რიგში იმ მაყურებლებისთვის შეიქმნა, რომლებიც 12-ზე არ იძინებენ, არადა დღის ამ მონაკვეთში ქართულ ტელეარხებზე ბევრს ვეღარაფერს პოულობენ საინტერესოს.

გიორგი ლაფერაშვილი On.ge-სთან საუბარში აღნიშნავს, რომ სხვა შუაღამე შეცვლის ღამის ეთერის კონცეფციას, რადგან ეს იქნება გადაცემა, რომელიც პირდაპირ ეთერში გავა. ასე რომ, მაყურებელთან ერთად წამყვანებიც იფხიზლებენ.

სხვა შუაღამის პროდიუსერი სალომე ბენაშვილი აღნიშნავს, რომ ამ გადაცემაში იქნება განხილული თითქმის ყველა ის თემა, რომელზეც საზოგადოებაში აქტიურად საუბრობენ, მაგრამ სატელევიზიო სივრცეს იშვიათად უთმობენ: "ველაფერი იქნება სხვანაირად, განსხვავებულად დანახული და შეფასებული".

სხვა შუაღამეში სოციალურად და პოლიტიკურად მნიშვნელოვანი თემების სუბიექტური ანალიზის გარდა, მაყურებლები საინტერესო ამბებს სპორტის, ხელოვნების, მეცნიერებისა და სხვა სფეროების შესახებაც მოისმენენ. სხვა შუაღამე თანამედროვე ქართველ მუსიკოსებსაც დაუთმობს დროს.

"სხვა შუაღამეში მაყურებელი ნახავს სრულიად განსხვავებულ შეფასებებს იმ თემების შესახებ, რომელსაც ყოველდღიურად ისმენს. ეს იქნება სუბიექტური, თუმცა ღრმა და კომპეტენტური მსჯელობა წამყვანების მხრიდან, რაც ამ გადაცემას ყველა სხვა შოუსგან გამოარჩევს", - ამბობს სალომე ბენაშვილი.

სხვა შუაღამის პირველი გადაცემა რუსთავი 2-ის ეთერში 25 მარტს პირდაპირ ეთერში გავა.