საქართველოს პრემიერ-მინისტრი, მამუკა ბახტაძე ამბობს, რომ თიბისი ბანკის ერთ-ერთი მეწილისგან, მამუკა ხაზარაძისგან შეხვედრის შესახებ "ოფიციალური წერილი" არ მიუღია. ამის შესახებ მან მთავრობის სხდომამდე ბრიფინგზე განაცხადა.

"მე ასეთი ოფიციალური წერილი ნამდვილად არ მიმიღია. რაც შეეხება იმას, ვთქვათ, რომ ჩვენ, და ამ შემთხვევაში, მე არ გამოვეხმაურე, ესეც არ შეესაბამება რეალობას. მინდა გითხრათ, რომ მე ბიზნესასოციაციის წარმომადგენლებთან, რომლის წევრის გახლავთ ბანკი, მქონდა შეხვედრა მათივე ინიციატივით", — განაცხადა ბახტაძემ.

21 თებერვალს მამუკა ხაზარაძემ თიბისიში ხელმძღვანელი თანამდებობის დატოვებისას განაცხადა, რომ არცერთ სახელმწიფო მოხელეს არ გამოუთქვამს სურვილი, პრემიერის და მისი მინისტრების ჩათვლით, რომ მათ შეხვედროდნენ და პირადად დაინტერესებულიყვნენ თიბისის საქმით:

"მიუხედავად იმისა, რომ რამოდენიმე მათგანს პირადად მივწერე და შესაბამისი დოკუმენტებიც გადავუგზავნე გასაცნობად, პასუხი არავისგან მოსულა. სამაგიეროდ მოვისმინე მათი ბევრი კომენტარი საჯარო სივრცეში".