ქართული ოცნების დეპუტატის ლევან გოგიჩაიშვილის თქმით, პარლამენტის თავმჯდომარე ირაკლი კობახიძე არაადეკვატურია და თანამდებობისთვის შეუფერებელია. როგორც გოგიჩაიშვილმა ჟურნალისტებთან თქვა, პარლამენტის თავმჯდომარემ რეალობის შეგრძნება დაკარგა:

"თქვენ თვითონ [ჟურნალისტებს] გეცინებათ მაგ განცხადებაზე და მე რა უნდა შევაფასო? მე ამას ვუთვლი, როგორც არაადეკვატურ განცხადებად, რადგან ვერ არის თავის ადგილზე და ვერ არის თავის თავში დარწმუნებული, სამწუხაროდ. ძალინ გული მწყდება, რომ ყოველდღიურად ხდება რეგრესი".

პარლამენტში ქვედა ინსტანციებში მოსამართლეების უვადოდ დანიშვნის დროებით შეჩერებასთან დაკავშირებით კანონპროექტზე მსჯელობდნენ. ირაკლი კობახიძემ განაცხადა, რომ კანონპროექტი კონსტიტუციას ეწინააღმდეგება და დაამატა, რომ ლევან გოგიჩაიშვილსა და ნაციონალურ მოძრაობას შორის კონსენსუსი ნიშანდობლივია. სიტყვის ბოლოს კი აღნიშნა, რომ ნაციონალური მოძრაობისა და უმრავლესობის ზოგიერთი დეპუტატის კონსენსუსი ბევრზე მეტყველებს.

კობახიძის განცხადებას გამოეხმაურა უმრავლესობის დეპუტატი გედევან ფოფხაძე და თქვა, რომ როდესაც ლევან გოგიჩაიშვილი ნაციონალურ მოძრაობას ებრძოდა და ციხეში იჯდა, ირაკლი კობახიძე "ბრტყელ-ბრტყელ საუბარს სწავლობდა". ეკა ბესელიამ კი აღნიშნა, რომ როდესაც ისინი "ტყვიების ზუზუნში იდგნენ", ირაკლი კობახიძე გოგლი-მოგლს მიირთმევდა.