ევროპული საქართველოს დეპუტატმა პარლამენტში, სადაც ინფრასტრუქტურის მინისტრს უსმენენ, გიგა ბოკერიამ უმრავლესობას შესთავაზა, გუნდიდან "მადლობებისთვის და ქებისთვის" ერთი დეპუტატი გამოიყოს და ყველას სახელით მოიხადოს მადლობა.

"მე დარწმუნებული ვარ, ქალბატონი მაია საკუთარი დროის გაფრთხილების ამბავში არ იქნება ნაწყენი, თუ ძალიან ბევრ მადლობას არ მოისმენს. იქნებ განიხილოთ ეს წინადადება. ქება ყველას სჭირდება, მაგრამ ზომიერად", — ასე მიმართა გიგა ბოკერიამ პარლამენტში შეკრებილ დეპუტატებს.

პარლამენტში მინისტრის საათის ფარგლებში ინფრასტრუქტურის მინისტრის, მაია ცქიტიშვილის მოსმენა მიმდინარეობს. კითხვა-პასუხის რეჟიმის დროს, დეპუტატების ნაწილმა კითხვის დასმისას მინისტრს მადლობა გადაუხადეს.

დეპუტატმა სიმონ ნოზაძემ მინისტრს უთხრა, რომ ამ მასშტაბის პროექტები ჯერ არ განხორციელებულა ხაშურში. რატი იონათამიშვილისთვის კი დღევანდელი დღე არის მაგალითი, თუ როგორი პასუხისმგებლობით გამოირჩევა მთავრობა. პარლამენტის წევრმა დავით სონღულაშვილმა მადლობა გადაუხადა მთლიან სამინისტროს მხარდაჭერისთვის. გოგა გულორდავამ მაია ცქიტიშვილსა და მის გუნდს ასევე მადლობა გადაუხადა "კარგი კომუნიკაციისათვის". დეპუტატმა თამარ ხულორდავამ კი მინისტრს ასევე ძალიან დიდი მადლობა უთხრა მოხსენებისთვის.