თბილისის მერმა კახა კალაძემ დღეს, 20 თებერვლის მთავრობის სხდომაზე პარკირების ახალი სისტემის ამოქმედებაზე ისაუბრა. ზონალურ-საათობრივი პარკირება საპილოტე პროექტის სახით პირველი ივლისიდან ამოქმედდება. მერის განცხადებით, პირველი არეალი, სადაც ეს წესი გავრცელდება კოტე აფხაზის ქუჩა (ლესელიძის ქუჩა) და მიმდებარე ქუჩებია. კალაძის თქმით, ყველა მანქანა უზრუნველყოფილი იქნება დღეში 4-ჯერ 15-წუთიანი პარკირებით.

პარკირების საფასური არ შეეხება:

  • საცხოვრებელი ადგილის მიმდებარედ გაჩერებულ სატრანსპორტო საშუალებას;
  • ელექტროძრავიან ავტომობილებს;
  • შშმ პირების კუთვნილ ავტომანქანებს;
  • ტაქსებს, რომელთათვის გამოყოფილია საპარკინგე ადგილები.

საათობრივი პარკირების გადახდა შესაძლებელი იქნება მობილური აპლიკაციით ან ქუჩაში დამონტაჟებული აპარატებით.

თბილისის მერის თქმით, ზონალურ-საათობრივი პარკირების პროექტი უახლოეს დღეებში საკრებულოს გადაეგზავნება განსახილველად.