ევროპულ საქართველოში აცხადებენ, რომ მამუკა ხაზარაძეს პარლამენტში გაერთიანებულ საკომიტეტო მოსმენის ჩატარებას სთავაზობენ. მათი თქმით, მოსმენაზე ქართული ოცნების დეპუტატებიც იქნებიან და კითხვებზე პასუხების გაცემა მოუწევთ.

"ჩვენ კარგად უნდა გვესმოდეს, რომ ეს არ არის ცალკე აღებული მამუკა ხაზარაძის პრობლემა. ეს არის სისტემის პრობლემა. ერთის მხრივ, ინსტიტუციების გამოყენების, კონკრეტული ადამიანების, თუ ბიძინა ივანიშვილის დაკვეთით და მეორე, ეს თავისთავად ძალიან საფრთხის შემცველია ყველა მოქალაქისთვის. ამიტომ პარლამენტი არის სწორედ ის ადგილი", — განცხადა უმცირესობის დეპუტატმა, ელენე ხოშტარიამ. მისივე თქმით, თუ ხაზარაძე ამ ფორმატს არ დათანხმდება უმცირესობის სხდომაზე მისვლის ფორმატიც მისაღები იქნება.

დღეს, 19 თებერვალს ევროპული საქართველოს დეპუტატმა, დავით ბაქრაძემ პარლამენტში მოსმენაზე მამუკა ხაზარაძე მიიწვია. ბაქრაძემ შესთავაზა ხაზარაძეს დაესწროს იმ საკომიტეტო მოსმენას, სადაც ეროვნული ბანკის პრეზიდენტი, კობა გვენეტაძეც იქნება. ხაზარაძემ და ჯაფარიძემ განცხადება გაავრცელეს და აღნიშნეს, რომ მზად არიან მივიდნენ პარლამენტში და დაესწრონ შესაბამისი ფორმატის შეხვედრას.