ბიძინა ივანიშვილი სამეგრელოს რეგიონულ მედიასთან შეხვედრისას ლეიბორისტულ პარტიას აფასებს. მისი თქმით პარტია ერთიანი ნაციონალური მოძრაობის მიერაა ნაყიდი და ნათელაშვილისთვის მხარდაჭერა სასირცხვილოა.

"სირცხვილია, რომ ლეიბორისტულ პარტიას დღეს კიდევ მხარს უჭერენ. მათ რუსთავი 2 აპიარებს დღესაც. ფსევდო ოპოზიცია მაგათი ნასწავლი და მოგონილია თავიდან ბოლომდე".

ყოფილი პრემიერი განმარტავს, რომ ეს შეფასება რესპუბლიკურ პარტიასთან შესადარებლად მოიყვანა და ლეიბორისტებისგან განსხვავებით ვერ იტყვი, რომ რესპუბლიკელები ის პარტიაა, რომელსაც მოსახლეობამ ხმა არ უნდა მისცეს.

"შეხვედრები რეგიონულ მედიასთან", - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერ-მინისტრი ბიძინა ივანიშვილი მონაწილეობს.

გადაცემას 2030-ის ჟურნალისტები ნათია თოიძე და მიხეილ ფეიქრიშვილი უძღვებიან. პროექტის პირველი გადაცემა 1 სექტემბერს, 12:00 საათზე აჭარიდან გავიდა GDS-ის პირდაპირ ეთერში.

ყოფილი პრემიერი პირველად აჭარის და გურიის რეგიონის ჟურნალისტებს უკვე შეხვდა, ამჯერად ის სამეგრელოს მედიის წარმომადგენლებთან მართავს შეხვედრას.