მთავრობის ადმინისტრაციის ცნობით, საქართველოს მონტენეგროს პრეზიდენტი ეწვევა. მილო დუკანოვიჩმა პრემიერ-მინისტრ მამუკა ბახტაძის მიწვევა მიუნხენის უსაფრთხოების 55-ე კონფერენციის ფარგლებში დღეს, 16 თებერვალს გამართულ შეხვედრაზე მიიღო.

ადმინისტრაციის განცხადებაში ნათქვამია, რომ მხარეების შეხვერისას ყურადღება გამახვილდა ევროპული და ევროატლანტიკური ინტეგრაციის პროცესში მონტენეგროს გამოცდილების გაზიარების მნიშვნელობაზე.

"მე პრემიერ-მინისტრი მონტენეგროში მივიწვიე, მანაც დამპატიჟა თბილისში, რასაც სიხარულით დავთანხმდი. აღვნიშნეთ, რომ არსებობს ბევრი სფერო, სადაც შესაძლებელია ჩვენი თანამშრომლობის გაუმჯობესება, თუმცა ასევე შევთანხმდით, რომ პრიორიტეტი მაინც ეკონომიკური თანამშრომლობაა. ჩვენ ერთმანეთს უნდა გავუზიაროთ გამოცდილება, კერძოდ ტურიზმის და ეკონომიკის სფეროებში და ამ მიმართულებით არსებული თანამშრომლობა მომავალშიც გაგრძელდება. საქართველო არის მონტენეგროს მეგობარი ქვეყანა და მონტენეგროც საქართველოს მეგობარია. ჩვენ მომავალშიც გავაგრძელებთ ჩვენს მნიშვნელოვან ურთიერთობებს და ორმხრივ თანამშრომლობას", - განაცხადა მონტენეგროს პრეზიდენტმა საქართველოს პრემიერ-მინისტრთან შეხვედრის შემდეგ.

2017 წლის ივნისში მონტენეგრო ჩრდილო-ატლანტიკური ალიანსის 29-ე წევრი ქვეყანა ოფიციალურად გახდა. მისი ნატოში გაწევრიანების შესახებ გადაწყვეტილება 2015 წლის დეკემბრეში მიიღეს.