"ნებისმიერი ბავშვისთვის 7 წლის ასაკში საერთაშორისო დონეზე ცნობადობა რთული სამართავია. ავღანეთში კი ეს შესაძლოა, სიცოცხლისთვის საფრთხის შემცველიც კი იყოს", — წერს CNN.

ავღანელი მურთაზა აჰმადი, ლიონელ მესის ყველაზე პოპულარული ფანი 5 წლის ასაკში გახდა, როდესაც მისი სურათი გამოქვეყნდა - მურთაზას პოლიეთილენის პარკი ეცვა, ზედ კი ფლომასტერით მესი ეწერა.

ამბავი უსწრაფესად გავირუსდა და 5 წლის ავღანელმა ბიჭმა ბარსელონას ფეხბურთელისგან საჩუქრად მაისური მიიღო.

მურთაზას ოცნება 13 დეკემბერს აუხდა, როდესაც ის ყატარში, ბარსელონას თამაშზე ჩავიდა და მესის პირადად შეხვდა. მურთაზამ საყვარელ კლუბთან ერთად ფოტოც გადაიღო.

ფოტო: Getty Images

დღეს, აჰმადი ბევრ ადამიანს ახსოვს — ის კი დამალვას ცდილობს და გარბის...

აჰმადის პრობლემები ლიონელ მესისთან შეხვედრის შემდეგ დაიწყო. ეს არ იყო პაპარაცების ყურადღებითა და მისი ცნობადობით გამოწვეული პრობლემა. ეს პრობლემა თალიბანი იყო, რომელიც ნოემბერში ჯაგორის დასახლებაში შეიჭრა.

"თალიბანი კლავდა ჩვენს ნათესავებს. მისი ჯარისკაცები სახლებს ჩხრეკდნენ და ადამიანებს კლავდნენ. ჩვენ აგვიკრძალეს ფეხბურთის თამაში და სახლიდან გასვლა. მძიმე ტექნიკისა და იარაღის ხმა, ხალხის ყვირილი გვესმოდა", — უთხრა აჰმადიმ CNN-ს.

აჰმადის დედის, შარიქას თქმით, აჰმადი ფაქტობრივად თალიბანის სამიზნე გახდა. მას შემდეგ რაც მურთაზა ლიონელ მესის შეხვდა ჩვენი ოჯახის ცხოვრება გართულდა. არა მხოლოდ თალიბანი, ასევე, სხვა დაჯგუფებებიც ფიქრობდნენ, რომ მესი გვეხმარებოდა და ფულს გვაძლევდა. ჩვენ სკოლაში აღარ ვუშვებდით მას, გვემუქრებოდნენ...", — უთხრა CNN-ს აჰმადის დედამ.

ფოტო: CNN

მურთაზას თქმით, მან უთხრა დედას, სადმე სხვაგან წაეყვანა. საბოლოოდ, მათ მამა დაეხმარა ახლომდებარე ქალაქ ბამიანში გადასულიყვნენ.

"ბოლო დღე, როცა მამა ვნახე იყო პირველი დღე, როცა ჩვენ ამ ქალაქში მოვედით. ის უკან დაბრუნდა და ამის შემდეგ აღარ გამოჩენილა. ძალიან მენატრება. როცა ის ურეკავს დედას, ველაპარაკები ხოლმე".

ქალაქ ბამიანიდან აჰმადი და დედამისი ავღანეთის დედაქალაქ ქაბულში გადავიდნენ, სადაც ისინი სხვა ლტოლვილებს შორის იმალებიან. მაგრამ მისი დედა თავს ისევ არ გრძნობს უსაფრთხოდ. ეშინია, რომ მის შვილს, მილიონერ ფეხბურთელთან კავშირის გამო, გაიტაცებენ.

"უკეთესი იქნებოდა, მურთაზა ცნობილი არ გამხდარიყო. ახლა ჩვენი სიცოცხლე რისკის ქვეშაა. ის მთელ თავის დროს სახლის კედლებში ატარებს",— ამბობს აჰმადის დედა.