ირაკლი ოქრუაშვილმა TV პირველში სტუმრობისას განაცხადა, რომ ილია მეტრეველის გადაყენება ქართული ოცნების მხრიდან იყო მესიჯი, რომ ისინი მასთან "მეგობრობას არ აპირებენ":

"ეს იყო ბოლო წვეთი მათი მხრიდან, ეს იყო გარკვეული გზავნილი მათი მხრიდან, რომ "ჩვენ შენთან მეგობრობას არ ვაპირებთ". საკმაოდ კარგი დამოკიდებულება მაქვს რამდენიმე მინისტრთან, საარჩევნო შეხვედრებზე რომ დავდივარ, ხალხს ვეუბნები, რომ პარტიულ ბიულეტინში შემოხაზონ ქართული ოცნება, აი მეტი რა უნდა გავაკეთო უბრალოდ ვერ წარმომიდგენია მათთან მიმართებაში".

ოქრუაშვილი აცხადებს, რომ ის "საკმაოდ კონსტრუქციული" იყო ოცნების მიმართ და საკმაოდ მკაფიო გზავნილები ჰქონდა, რომ არ აპირებდა მმართველ პარტიასთან დაპირისპირებას:

"მათ წითელი ხაზი გადაკვეთეს, როდესაც ილია მეტრეველი მოხსნეს თანამდებობიდან".

ირაკლი ოქრუაშვილმა ასევე განაცხადა, რომ მას რუსთავი 2-ის მესაკუთრეობასთან დაკავშირებული დოკუმენტის გასაჯაროვება არ სურდა და ის იძულებული გახადეს ეს გაეკეთებინა.