გორის მაჟორიტარობის დამოუკიდებელმა დეპუტატმა ირაკლი ოქრუაშვილმა TV პირველის ეთერში განაცხადა, რომ მას რუსთავი 2-ის მესაკუთრეობასთან დაკავშირებული დოკუმენტის გასაჯაროვება არ სურდა და ის იძულებული გახადეს ეს გაეკეთებინა:

"მე არ ვაპირებდი ამის გამომზეურებას, მათ შორის არც არჩევნების შემდეგ, ვაპირებდი გარკვეულ სხვა დროს. მინდოდა სხვა ტიპის ურთიერთობებით გამერკვია ეს პრობლემა".

ირაკლი ოქრუაშვილის თქმით, ის ქართული ოცნების გენერალური მდივნის, კახა კალაძის მოქმედებებმა აიძულა დოკუმენტი გაესაჯაროვებინა:

"ის [კახა კალაძე] 3 წელია ჩემთან მიმართებაში არის ფეხის დამდების და ჩასაფრებულის პოზიციიდან. რაღაცნაირად მეკინკლავება თუ მებრძვის".

ოქრუაშვილის თქმით, კალაძის გადაწყვეტილება იყო გუშინ მისი თანაგუნდელის ილია მეტრეველის გორის მუნიციპალიტეტის საკრებულოს თავმჯდომარის თანამდებობიდან გადაყენება და სწორედ ამან უბიძგა მას გადაწყვეტილების მიღებისკენ.

4 სექტემბერს, თავდაცვის ყოფილმა მინისტრმა, ირაკლი ოქრუაშვილმა რუსთავი 2-თან საუბარში განმარტა, რომ ტელეკომპანიის წილი ქიბარ ხალვაშს არასდროს ეკუთვნოდა და მისი მფლობელი თავად იყო. აღნიშნულის გამო ის სამართლებრივი დავის დაწყებას აპირებს.

ამავე დღეს რუსთავი 2-ის ჟურნალისტმა, ნოდარ მელაძემ P. S.-ში განაცხადა, რომ მას გადასცეს დოკუმენტი, რომელშიც ჩანს, რომ ტელეკომპანიის წილის მფლობელი ირაკლი ოქრუაშვილია და არა ქიბარ ხალვაში. მისი განმარტებით, 5-პუნქტიანი შეთანხმება 2010 წლის თებერვალშია გაფორმებული.