რაგბი ნამდვილად ჩვენი თამაშია, თუმცა საქართველოს გარდა, ევროპაში კიდევ ექვსი ქვეყანა არსებობს, რომელსაც თავისუფლად შეუძლია იგივე თქვას: ინგლისი, საფრანგეთი, ირლანდია, იტალია, შოტლანდია და უელსი.

1 თებერვალს რაგბიში ევროპის ყველაზე მნიშვნელოვანი ტურნირი, ექვსი ერის ჩემპიონატი იწყება. კითხვაზე "სად ვუყურო" კი უკვე არსებობს პასუხი. ქართველი გულშემატკივრები თამაშების პირდაპირ ეთერში ნახვას ექსკლუზიურად მესამე არხზე შეძლებენ, კომენტატორი კი ზაალ გიგინეიშვილი იქნება.

მესამეს სპორტული რედაქციის ხელმძღვანელმა გოჩა თანდარაშვილმა Sport.on.ge-სთან საუბარში აღნიშნა, რომ ექვსი ერის ჩემპიონატის ჩვენება ტელეკომპანიამ მაღალი საზოგადოებრივი ინტერესიდან გამომდინარე გადაწყვიტა.

"წლების წინ საქართველოში მხოლოდ ის უყვარდათ, რომ რუსეთს ვუგებდით. მერე ნელ-ნელა ხალხმა ნაკრები შეიყვარა და სხვა ქვეყნებთან თამაშებზეც გაავსო სტადიონი. ახლა უკვე ის დროა, როდესაც თვითონ სპორტის სახეობა შეუყვარდა ძალიან ბევრ ადამიანს და მარტო ჩვენი ნაკრების თამაშებით არ კმაყოფილდება", - ამბობს გოჩა თანდარაშვილი.

"ექვსი ერის მიმართ ინტერესი უკვე საკმაოდ დიდია. ესაა ტურნირი, რომელშიც გვჯერა, რომ ძალიან მალე საქართველოს ნაკრებიც ითამაშებს და ეგეც ცალკე ინტერესის საბაბია", - დაამატა გოჩა თანდარაშვილმა.

საქართველოსთვის ექვსი ერის 2019 წლის ტურნირს დიდი მნიშვნელობა აქვს. ეროვნული ნაკრების მომდევნო მეტოქეები სწორედ ექვსი ერის წევრები იქნებიან.

"ამის გარდა, ზაფხულში ვეთამაშებით შოტლანდიას, შემდეგ მსოფლიო ჩემპიონატზე უკვე უელსს ვეთამაშებით და ჩვენი ქომაგებისთვის საინტერესო იქნება მათი მატჩების ყურება. ჩვენი არხი სპორტულ კონტენტზე დიდ აქცენტს აკეთებს. ჩვენ გვიყვარს სპორტი და ექვსი ერის ტურნირი ძალიან კარგი საშუალებაა, როგორც მაყურებლის მოზიდვის მხრივ, ასევე პრესტიჟის თვალსაზრისით", - ამბობს მესამეს სპორტული რედაქციის ხელმძღვანელი.

პირველ შეხვედრაში ერთმანეთს საფრანგეთისა და უელსის ნაკრებები დაუპირისპირდებიან, თამაში 00:00 საათზე დაიწყება.

გასულ წელს ტურნირის ჩემპიონი ირლანდიის ნაკრები გახდა. ჩემპიონატი ყველაზე მეტჯერ ინგლისის ნაკრებს აქვს მოგებული. რაგბის ექსპერტების აზრით, ირლანდიელებს გამარჯვებისთვის წელსაც დიდი შანსები აქვთ, მათ უშუალო კონკურენტებად კი ინგლისისა და საფრანგეთის ნაკრებებს განიხილავენ.