დავით უსუფაშვილი რესპუბლიკური პარტიის შესახებ ბიძინა ივანიშვილის კომენტარს პასუხობს. მისი თქმით, ქვეყანაში საკმაოდ მძლავრობს ჭორების გამავრცელებელი მანქანა და სწორედ ამის მსხვერპლი იყო ბიძინა ივანიშვილი:

"თურმე მე ან რომელიმე რესპუბლიკელს ილია ჭავჭავაძე ცუდ კაცად მიგვაჩნია. აქა არაა სალაპარაკი სახელმწიფოზე, ესაა ჭორების აყოლა".

უსუფაშვილი მიიჩნევს, რომ კონკურენტი პარტიის კრიტიკა ყოფილი პრემიერის მხრიდან ნორმალურია და ამის უფლება ყველას აქვს:

"ბატონი ბიძინა დღეს ჩართულია ერთი კონკრეტული საარჩევნო სუბიექტის საარჩევნო კამპანიაში. მე არ მიკვირს, რომ იგი საუბრობს აღმატებით ხარისხში მხოლოდ ერთ პარტიაზე, რომელსაც იგი მხარს უჭერს და რომლის გამარჯვებაზეც იბრძვის და იღწვის და აკრიტიკებს ყველა დანარჩენს ვინც მისი კონკურენტია. ბიძინა ივანიშვილს ისეთივე უფლება აქვს იყოს კრიტიკული სხვა პარტიების მიმართ, როგორც მე და სხვებსაც".

დავით უსუფაშვილის თქმით, იგი უახლოეს დღეებში წერილს გამოაქვეყნებს, სადაც მისი და რესპუბლიკური პარტიის ხედვების შესახებ იქნება საუბარი:

"რაც შეეხება სახელმწიფოს და სახელმწიფოებრივ მიდგომებს, ეს არის საკითხები რომელზეც მე მასთან [ბიძინა ივანიშვილთან] საათები მაქვს გატარებული მსჯელობაში. ურიგო არ იქნება თუკი ამას საჯაროდაც გავაკეთებ. მე უახლოეს დღეებში შემოგთავაზებთ ხედვებს თუ რა გეგმა გვქონდა ქართული სახელმწიფოს მომავლისთვის და რაში შეიძლება არ ვეთანხმებოდეთ მე და ბიძინა ივანიშვილი".

ბიძინა ივანიშვილი გურიის რეგიონულ მედიასთან შეხვედრაზე სხვა პოლიტიკურ პარტიებთან ერთად რესპუბლიკელებიც შეაფასა. მისი თქმით, რესპუბლიკელებს ძალიან დაბალი რეიტინგი აქვთ და ამას საზოგადოება სრულიად სამართლიანად აფასებს, რისი მიზეზიც ისაა, რომ რესპუბლიკური პარტიისთვის სახელმწიფო იწყება იქ, სადაც იწყება რესპუბლიკური პარტია და მთავრდება ზუსტად იქ, სადაც მთავრდება რესპუბლიკური პარტია