ბიძინა ივანიშვილი გურიის რეგიონულ მედიასთან შეხვედრაზე სხვა პოლიტიკურ პარტიებთან ერთად რესპუბლიკელებიც შეაფასა. მან პარტიის რამდენიმე დადებითი თვისება ჩამოთვალა:

  • ძველი პარტიაა;
  • თანამიმდევრობით გამოირჩევა;
  • იცავენ ელემენტარულ წესებს, რაც აუცილებელია პოლიტიკური პარტიის არსებობისთვის;
  • უყვართ პროცედურული დემოკრატია;

ამასთან ერთად მან აღნიშნა, რომ რესპუბლიკელებს ძალიან დაბალი რეიტინგი აქვთ და ამას საზოგადოება სრულიად სამართლიანად აფასებს, რისი მიზეზიც ისაა, რომ რესპუბლიკური პარტიისთვის სახელმწიფო იწყება იქ, სადაც იწყება რესპუბლიკური პარტია და მთავრდება ზუსტად იქ, სადაც მთავრდება რესპუბლიკური პარტია:

"დანარჩენ სახელმწიფოზე მოკლედ რომ ვთქვა, ასეთი წარმოდგენა აქვთ, რომ ილია ჭავჭავაძე არც თუ ისე კარგი კაცია, და ვიღაც დამპყრობელი არც თუ ისე ცუდი კაცია".

რესპუბლიკელების მხრიდან ასეთი შეფასებების გაკეთებას, ყოფილი პრემიერი მათი "თავების განათლებით დამძიმებას" უკავშირებს. საერთო სახალხო საქმეზე და სახელმწიფოზე ფიქრის რესურსი კი მისივე თქმით, პარტიის წევრებს არ აქვთ და მხოლოდ ერთ ჯგუფზე ახერხებენ მორგებას.

"შეხვედრები რეგიონულ მედიასთან", - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერ-მინისტრი ბიძინა ივანიშვილი მონაწილეობს.

გადაცემას 2030-ის ჟურნალისტები ნათია თოიძე და მიხეილ ფეიქრიშვილი უძღვებიან. პროექტის პირველი გადაცემა 1 სექტემბერს, 12:00 საათზე აჭარიდან გავიდა GDS-ის პირდაპირ ეთერში.

ყოფილი პრემიერი პირველად აჭარის რეგიონის ჟურნალისტებს შეხვდა, ამჯერად ის გურიის მედიასთან მართავს შეხვედრას.