იუვენტუსის თავდამსხმელი გონსალო იგუაინი ლონდონში გაფრინდა, რათა ჩელსიში იჯარის წესით გადასვლის საკითხები საბოლოოდ მოაგვაროს.

არგენტინელი ფეხბურთელი, რომელიც იუვენტუსიდან მილანში იყო განათხოვრებული, მაურისიო სარის გუნდს სავარაუდოდ დღეს შეუერთდება.

იგუაინს სამედიცინო შემოწმება აქვს გასავლელი და თუ ამ პროცედურებს წარმატებით გაივლის, შესაძლოა გუნდს მომდევნო შეხვედრაში ტოტენჰემის წინააღმდეგაც დაეხმაროს. ამისათვის საჭიროა, რომ ჩელსიმ მისი დარეგისტრირება გუნდის შემადგენლობაში დღესვე მოასწროს.

გონსალო იგუაინი იუვენტუსში 2016 წელს, კლუბისთვის სარეკორდო თანხად, 75.3 მილიონ ფუნტ-სტერლინგის სანაცვლოდ გადავიდა. 31 წლის ფორვარდმა კლუბში გატარებული ორი სეზონის განმავლობაში 40 გოლის გატანა შეძლო, 2018 წლის აგვისტოში კი მილანში იჯარის წესით გადაბარგდა.

მილანში მისი კარიერა წარმატებულად დაიწყო. პირველ ხუთ შეხვედრაში, იგუაინმა 6 გოლის გატანა შეძლო, თუმცა ბოლო თორმეტ შეხვედრაში მან მხოლოდ ერთხელ აიღო მეტოქის კარი.

გონსალო იგუაინს მაურისიო სარის ხელმძღვანელობით ადრეც უთამაშია. არგენტინელი ფეხბურთელი სარის დაქვემდებარებაში ნაპოლიში მუშაობის დროს იყოს, რა დროსაც იგუაინი სეზონში გატანილი 36 გოლით ჩემპიონატის ბომბარდირიც გახდა.

ჩელსი ამ დროისთვის პრემიერ ლიგის ცხრილში მეოთხე ადგილზე იმყოფება. მას ორი ქულით ჩამორჩებიან არსენალი და მანჩესტერ იუნაიტედი.