პირველადი ინფორმაციით, ლიბიაში გაუჩინარებული მეზღვაური, დავით რაზმაძე გარდაცვლილი იპოვეს. ამის შესახებ საზღვაო ტრანსპორტის სააგენტოს დირექტორმა, თამარ იოსელიანმა განაცხადა.

"სამწუხაროდ, დღეს შეგვატყობინეს, რომ ცხედარი ნაპოვნია. პირველადი ინფორმაციით, ის ეკუთვნის ჩვენს მეზღვაურს, დავით რაზმაძეს", — განაცხადა იოსელინმა.

მისივე თქმით, ამ დროისთვის მიმდინარეობს ექსპერტიზა და მისი შედეგები ხვალ, 22 იანვრისთვის იქნება ცნობილი.

გუშინ, 20 იანვარს გავრცელდა ინფორმაცია, რომ ლიბიაში ქართველი მეზღვაური, დავით რაზმაძე დაიკარგა. რუსთავი 2-თან სატელეფონო ინტერვიუში მეზღვაურის ოჯახის წევრმა თქვა, რომ ის 7 იანვარს დაიკარგა, თუმცა გემის მფლობელმა კომპანიამ მათ ინფორმაცია 14 იანვარს მიაწოდა.