ბოლო სოციალური გამოკითხვის შედეგებით, რუსეთის მოსახლეობის თითქმის ნახევარს, 45 პროცენტს საბჭოთა კავშირის დაშლის გამო რცხვენია. ეს მაჩვენებელი წინა წელთან შედარებით 12 პროცენტით არის გაზრდილი. მოსახლეობა ორგანიზაცია ლევადა ცენტრმა გამოკითხა. კვლევა მთელი რუსეთის მაშტაბით 2018 წლის ნოემბერში მიმდინარეობდა.

კითხვაზე, თუ რა პოლიტიკური მოვლენა იწვევს თქვენში სირცხვილის განცდას, მოსახლოების 45 პროცენტი სსრკ-ს ნგრევას პასუხობს. საბჭოთა კავშირის დაშლაზე უფრო მეტად რუსეთის მოსახლეობის 61 პროცენტს მუდმივი სიღარიბის რცხვენია, რომელშიც "დიადი სახელმწიფო" ცხოვრობს. დასავლეთთან რუსეთის ეკონომიკური და ტექნოლოგიური ჩამორჩენა მოსახლოების მხოლოდ 24 პროცენტს აწუხებს.

თანამედროვე მოვლენებიდან რუსეთის მოსახლეობის 45 პროცენტისთვის ყველაზე საამაყო ყირიმის ანექსიაა. ყველაზე საამაყო ისტორიულ მოვლენად გამოკითხულთა 87% მეორე მსოფლიო ომში სსრკ-ს გამარჯვებას ასახელებს. გამოკითხულთა ნახევარი კოსმოსის ათვისებით ამაყობს, ხოლო რუსული ლიტერატურით 40%.

ყოველი 4 გამოკითხულიდან 3 რუსეთს "დიად, ზესახელმწიფოდ" მიიჩნევს. კიდევ უფრო მეტი, გამოკითხულთა 88% მომხრეა, რომ ქვეყანამ მომავალშიც შეინარჩუნოს ეს სტატუსი.

ამ მაჩვენებლების მიუხედავად, ვლადიმერ პუტინის ხელისუფლებაში მოსვლა სასირცხვილოდ მოსახლოების 9 პროცენტმა მიიჩნია. ეს მაჩვენებელი წინა წელთან შედარებით 6 პროცენტით არის გაზრდილი.

საბჭოთა ნოსტალგიის განცდა რუსეთის მოსახლეობაში ყოველთვის პოპულარული იყო, თუმცა ბოლო ათწლეულის მაქსიმუმი სწორედ წელს დაფიქსირდა. 2018 წლის საპრეზიდენტო არჩევნებამდე რამდენიმე კვირით ადრე ჟურნალისტის კითხვაზე, თუ რას შეცვლიდა იგი რუსეთის ისტორიაში, პუტინმა, სწორედ, საბჭოთა კავშირის ნგრევა დაასახელა. ამავე მოვლენას 2005 წელს პუტინმა საბჭოთა კავშირის ნგრევას მეოცე საუკუნის მთავარი გეოპოლიტიკური კატასტროფა უწოდა.

გაიგე მეტი: საბჭოთა კავშირის ნგრევის ისტორია ფოტოებში