საკონსტიტუციო სასამართლოს მოსამართლე ოთარ სიჭინავა, რომელიც დღეს საკონსტიტუციო სასამართლოში უნდა ყოფილიყო და სხვა მოსამართლეებთან ერთად განეხილა გიგი უგულავასა და კაბელების საქმესთან დაკავშირებული საკონსტიტუციო სარჩელი, თბილისში იმყოფებოდა. რუსთავი 2-მა ის საცხოვრებელი სახლის მიმდებარედ იმ დროს გადაიღო, როცა ძაღლებს ასეირნებდა. მოსამართლემ არ უპასუხა კითხვებს, რა მიზეზით არ გამოცხადდა სასამართლოში და რატომ არჩია პროცესზე დასწრებას ძაღლების გასეირნება.

საკონსტიტუციო სასამართლოს ჯერ არ გაუვრცელებია განცხადება, კონკრეტულად რა მიზეზით გადაიდო დღევანდელი სხდომა. სასამართლოს ცნობით, მხარეებს დამატებით ეცნობებათ არსებითი განხილვის თარიღის შესახებ. მოსარჩელეები მიიჩნევენ, რომ მოსამართლეთა ნაწილი განზრახ, პოლიტიკური ინტერესიდან გამომდინარე აჭიანურებს აღნიშნული საქმის განხილვას.

ოთარ სიჭინავა 2006 წლის 26 ივნისს საქართველოს უზენაესი სასამართლოს მიერ დაინიშნა საქართველოს საკონსტიტუციო სასამართლოს წევრად. 2006 წლის 30 სექტემბერს, ფიცის დადების დღიდან კი შეუდგა მოსამართლის უფლებამოსილების განხორციელებას.

ოთარ სიჭინავას ბოლო ქონებრივი დეკლარაცია 2016 წლის 16 მაისს აქვს შევსებული. შესაბამისად, აღნიშნული დოკუმენტი 2015 წლის 31 დეკემბრამდე არსებულ მონაცემებს შეიცავს.

ქონებრივი დეკლარაციის მიხედვით, მოსამართლე ოთარ სიჭინავას ქონება დანიშვნის დღიდან ყოველწლიურად იმატებდა. 2006 წელს მისი შემოსავალი დაახლოებით 40 ათასი ლარის ფარგლებში იყო, 2015 წლის განმავლობაში მან მოსამართლის მოვალეობის შესრულების სანაცვლოდ ანაზღაურების სახით მიიღო 115 302 ლარი, 2014 წელს კი 118 ათას ლარზე მეტი. საერთო ჯამში, მოსამართლის პოზიციაზე მუშაობის სანაცვლოდ ოთარ სიჭინავამ 2006 წლიდან 2016 წლამდე მიიღო 760 ათას ლარზე მეტი (აქ არ არის შესული 2016 წლის ანაზღაურება).

გარდა ამისა, ოთარ სიჭინავამ, ისევე როგორც საკონსტიტუციო სასამართლოს სხვა მოსამართლეებმა, ბათუმში საჩუქრად მიიღო 83მ² საცხოვრებელი ბინა. დეკლარაციის მიხედვით ოთარ სიჭინავა და მისი ოჯახი ფლობენ შემდეგი სახის ქონებას:

• საცხოვრებელი ბინა ნუცუბიძეზე, თბილისში, 120.00 კვ.მ;
• მიწის ნაკვეთი თელავში, სოფელ წინანდალში, ფართობი - 1074.90 კვ.მ;
• ბინა ბათუმში, რუსთაველის ქუჩა, ფართობი - 69.50 კვ.მ;
• ბინა ბათუმში, მ.აბაშიძე/ვ.ფშაველას ქუჩა 52/18, მშენებარე, ფართობი - 72.20 კვ.მ;
• მიწის ნაკვეთი თელავში, სოფელ წინანდალში, ფართობი - 2061.00 კვ.მ;
• დაუმთავრებელი სახლი თელავში, სოფელ წინანდალში, ფართობი - 71.00 კვ.მ;
• ბინა თბილისში, მგალობლიშვილის ქუჩაზე (საბურთალოს რაიონი) - 61.27 კვ.მ;