გონიოში, წვრთნების დროს დაკარგული სამხედრო მოსამსახურეებისთვის, დღეს, პატივის მიგების ცერემონიალი გაიმართება. ინფორმაციას, ამის შესახებ თავდაცვის სამინისტრო ავრცელებს.

განცხადების თანახმად, დაკარგული სამხედროების ოჯახის წევრებს თავდაცვის მინისტრი, აჭარის მთავრობის მეთაური და საქართველოს მართმადიდებელი ეკლესიის კათოლიკოს-პატრიარქი ილია II მოინახულებენ, რის შემდეგაც პატივის მიგების ცერემონიალი გაიმართება. ცერემონიალში მონაწილეობას მიიღებენ საქართველოს შინაგან საქმეთა სამინისტროს სასაზღვრო პოლიციის სანაპირო დაცვის თანამშრომლები, რომლებიც დაკარგული სამხედროების პატივის მისაგებად ზღვაში ორ გვირგვინს ჩაუშვებენ.

მიუხედავად ცერემონიალისა, გრძელდება დაკარგული სპეცრაზმელების სამძებრო ოპერაციები:

"პარალელურად, გონიოს ყოფილი სასროლეთის ტერიტორიაზე ორი დაკარგული სამხედრო მოსამსახურის, კაპრალ იაგო შარაძის და I კლასის რიგითის გიორგი ნანეტაშვილის სამძებრო-სამუშაოები გრძელდება.

ძებნის ოპერაციას საქართველოს თავდაცვის სამინისტრო საკუთარი ძალებით და იმ რესურსების მაქსიმალური ჩართულობით ახორციელებს, რომელიც უწყებას გააჩნია. ობიექტური მოცემულობიდან გამომდინარე, შესაძლოა, ქართულმა მხარემ კვლავაც მიმართოს საერთაშორისო პარტნიორებს ძებნის ოპერაციაში ჩართვის თხოვნით."

20 აგვისტოს თურქული ხომალდი სამძებრო სამუშაოებში ჩაერთო, თუმცა თავდაცვის სამინისტროს განცხადებით, 11 დღიანი სამუშაოების შემდეგ თურქულმა მხარემ ძებნის ოპერაციის შეჩერების გადაწყვეტილება მიიღო.

16 აგვისტოს გონიოს ყოფილი სასროლეთის ტერიტორიაზე, შავ ზღვაში მიმდინარე წვრთნის დროს, ორი სამხედრო მოსამსახურე - კაპრალი იაგო შარაძე და I კლასის რიგითი გიორგი ნანეტაშვილი დაიკარგნენ.