ყურადღება! მაგლების სამყაროში სიახლეა, მოისმინეთ ზაფხულის ბოლო დღის და ვფიქრობ ამ სეზონის ყველაზე ცხელი ახალი ამბავი.

გავრცელდა ჭორი, რომლის მიხედვითაც ჰარი პოტერი კინო-ეკრანებს უბრუნდება. გაზეთ New York Daily News იუწყება, რომ Warner Bros. ნაწარმოების ეკრანიზაციის უფლების მოპოვებას და ჰარის როლზე დენიელ რედკლიფის დათანხმებას ცდილობს.

თავად სტუდია ჭორს არ ადასტურებს და ავრცელებს განცხადებას, რომ ჰარი პოტერი და დაწყევლილი ბავშვი პიესაა და მისი ეკრანიზაციის გეგმები არ არსებობს.

თუმცა ასევე გავრცელდა ინფორმაცია, რომ ჭორი ჰოლივუდის კულუარებში (იქაც ჰქონიათ კულუარები) დაადასტურეს.

"ჰარი პოტერი და დაწყევლილი ბავშვი" ჯოან როულინგის ახალი პიესაა, რომელიც რამდენიმე თვის წინ წიგნად გამოიცა და გაყიდვების ლიდერი გახდა. სწორედ ამ გამოცემის დამსახურებით როულინგმა მოახერხა და უილიამ შექსპირის ადგილი დაიკავა.

რა თქმა უნდა, 2020 წელს გამოსულ ეკრანიზაციაში, (თუ ის გამოვიდა და იმედია გამოვა) ჩვენთვის საყვარელ თითქმის ყველა პერსონაჟს ვიხილავთ, თუმცა მოგიწოდებთ, რომ ვისაც მინერვა მაკგონაგელი გიყვართ და გენატრებათ, პოტერის მაგიური სამყაროდან სიცოცხლის გახანგრძლივების შელოცვა გამოიყენოთ და ერთად ვილოცოთ 81 წლის მეგი სმიტის ჯანმრთელობისთვის, მინიმუმ 2020 წლამდე მაინც.

ასე, რომ თუ იკითხავთ after all this time? პასუხი always ყოველთვის სწორი იქნება.