მაშ ასე მეგობრებო, ჯადოსნური სამყაროს დედოფალმა, ჯოან როულინგმა, უილიამ შექსპირს სამეფო კარის თამაშები მოუგო და რკინის ტახტიდან ჩამოაგდო.

ოფიციალურად დადასტურდა, რომ მწერალი რომელმაც წლების წინ მაგლებს 9¾ პლატფორმის მატარებელზე ბილეთი გვაჩუქა, ყველაზე პოპულარული და გაყიდვადი ბრიტანელი ავტორი გახდა.

მისი ახალი პიესა, ჰარი პოტერი და დაწყევლილი ბავშვი, ყოველ წუთში 879 ფუნტს გამოიმუშავებს, იმაზე მეტს, ვიდრე რომელიმე ავტორს ოდესმე დასიზმრებია. სულ რაღაც ერთ კვირაში, გაყიდვებმა მწერალს 8.7 მილიონი ფუნტი მოუტანა. წიგნის გამოსვლიდან ერთ კვირაში ახალი ისტორიის თითქმის მილიონი ეგზემპლარი გაიყიდა, მაშინ როდესაც, 1998 წლიდან დღემდე, შექსპირის უკვდავი ტრაგედიის, რომეო და ჯულიეტას, მხოლოდ 127 726 ასლია გაყიდული.

როულინგმა ცხონებული შექსპირი საფლავშიც არ მოასვენა, Avada Kedavra შემოსძახა და პირველი ადგილიდან მეორე ადგილზე გადაისროლა. თავად კი გარდა იმისა რომ ყველაზე ტიტულოვანი ბრიტანელი ავტორი გახდა, ახალი პიესის წყალობით ისტორიაში ყველაზე გაყიდვად წიგნებს შორის მეოთხე ადგილიც გაინაღდა, თუმცა გასაკვირი არც არის - ჰარი პოტერს და დაწყევლილ ბავშვს თავიდანვე უწოდებდნენ ბესტსელერობისთვის “განწირულ” წიგნს.