ქართული ოცნების დეპუტატმა ზაქარია ქუცნაშვილმა დღეს, 4 ივლისს ბრიფინგზე თიანეთში მომხდარ მკვლელობაზე ისაუბრა. ზაქარია ქუცნაშვილმა თქვა, რომ გახშირდა ალკოჰოლური თრობის ქვეშ მომხდარი დანაშაულები და მისი აზრით, მეტწილად ამას თიანეთის მერის, თამაზ მეჭიაურის" კაპოტზე ქეიფის პროპაგანდირება" უწყობს ხელს:

"მე როცა გამოვდიოდი და საჯაროდ ვაკრიტიკებდი, საჯარო სივრცეში ალკოჰოლური თრობის კამპანიას, ბევრი იუმორით ხვდებოდა იმას, რომ "კაპოტზე" ქეიფის პროპაგანდირება ეს ჩვეულებრივი ამბავია. მე მგონი, ყველა დარწმუნდება, სამწუხაროდ, რა მძიმე შედეგები გამოიღო ამ მავნე ზეგავლენის ცხოვრების პროპაგანდირებამ, იმიტომ რომ როცა მუნიციპალიტეტის ხელმძღვანელი "კაპოტზე" ქეიფით საჯაროდ დემონსტრირებს და მავნე ზეგავლენას ახდენს საზოგადოებაზე".

თამაზ მეჭიაური ზაქარია ქუცნაშვილის განცხადებას On.ge-სთან საუბარში გამოეხმაურა და თქვა, რომ ქუცნაშვილმა თავი უნდა შეიკავოს შეფასებებიდან, მაშინ როცა გამოძიება არ არის დასრულებული:

"სხვის ტრაგედიაზე ქულების ჩაწერა არ არის კაცური საქციელი, მის კაცობაზე დიდი აზრის არასდროს ვყოფილვარ, მაგრამ არ მეგონა აქამდე თუ დაეცემოდა. ჯერ ერთი, იქ ძიება არ არის დამთავრებული, მეორეც, ვინ ნასვამი იყო, ექსპერტიზას არ დაუდგენია. თვითონ იურისტი ჰქვია და ვის ვის, თუ არა იურისტს უნდა მოეხსენებოდეს უდანაშაულობის პრეზუმციის დაცვა".

დაბა თიანეთში ორი კაცი მოკლეს, ერთი კი დაჭრეს. შემთხვევა 2 იანვარს მოხდა. გამოძიება დამამძიმებელ გარემოში ჩადენილი განზრახ მკვლელობის მუხლით დაიწყო.