სკოლებსა და ბაღებში ბავშვების აცრების შესახებ ცნობის წარდგენა სავალდებულო პირველი ივნისიდან გახდება. ჯანდაცვის კომიტეტის თავმჯდომარის, აკაკი ზოიძის განცხადებით, ჯანმრთელობის შესახებ სავალდებულო ცნობაში აცრის სტატუსის გრაფაც დაემატება.

2019 პირველი იანვრიდან საქართველოს ტერიტორიაზე მაცხოვრებელი ნებისმიერი ადამიანი ვალდებულია, რომ ეროვნული კალენდრით განსაზღვრული პროფილაქტიკური აცრები გაიკეთოს.

აკაკი ზოიძე On.ge-სთან საუბრისას ამბობს, რომ ეს მშობლებისთვის დაიცვან ბავშვის ჯანმრთელობა და სიცოცხლე. ისვე აღნიშნავს, რომ სამედიცინო პერსონალი ვალდებული იქნება, მშობლებს ბავშვებისთვის აცრის გაკეთება მოსთხოვოს.

ზოიძის განმარტებით, სანქციები განსაზღვრული არ არის, თუმცა თუ მშობლები ბავშვებს ისევ არ აცრიან, სანქციების დაწესებას არ გამორიცხავს.

"შესაძლოა, ბაღში ჩარიცხვის შემთხვევაში უპირატესობა იმ ბავშვს მიენიჭოს, რომელსაც აცრები ექნება გაკეთებული", — აღნიშნა ზოიძემ.

პროფილაქტიკური აცრების ეროვნული კალენდრის მიხედვით, 14 წლამდე ბავშვებისთვის ათი სავალდებულო აცრაა განსაზღვრული, მათგან ცხრა ხუთ წლამდე ასაკში კეთდება.

ფოტო: დაავადებათა კონტროლისა და საზოგადოებრივი ჯანმრთელობის ეროვნული ცენტრი

სავალდებულო ვაქცინაცია აშშ-სა და ევროპის რამდენიმე ქვეყანაშია გავრცელებული, მათ შორის საფრანგეთში, იტალიასა და გერმანიაში. ჯანდაცვის მსოფლიო ორგანიზაციის ინფორმაციით, 2018 წლის პირველ 6 თვეში ევროპაში მწვავე ინფექციური ვირუსული დაავადების, წითელას 41 ათასი შემთხვევა დაფიქსირდა, მათგან 37 გარდაიცვალა. 2017 წელს წითელას თითქმის 24 ათასი შემთხვევა იყო, 2016 წელს 5 ათასზე მეტი. ექსპერტების აზრით, წითელათი ინფიცირების ზრდის მაჩვენებელი ვაქცინაციისთვის იშვიათად მიმართვის პრობლემას უკავშირდება.

ვაქცინაციის ისტორია საქართველოში

ვაქცინაციით 2000-2016 წლებში წითელათი გარდაცვალების შემთხვევები 84 პროცენტით შემცირდა და 20 მილიონზე მეტი ადამიანის სიცოცხლე გადაარჩინა. ტუბერკულოზის, პოლიომიელიტის, დიფთერიის, ტეტანუსის, ყივანახველას და წითელას საწინააღმდეგო ვაქცინაციით მსოფლიოში ყოველწლიურად 2,5 მილიონამდე ბავშვის, ხოლო B ჰეპატიტის საწინააღმდეგო ვაქცინაციით 0,6 მილიონი ადამიანის სიცოცხლეა გადარჩენილი.

2013-2014 წლებში საქართველოში წითელას 11 ათასი შემთხვევა დაფიქსირდა, აქედან 3 გარდაიცვალა. ძირითადად ავადდებოდნენ ერთ წლამდე და 15-დან 30 წლამდე ასაკის მოსახლეობა.

2008 წელს 6-დან 27 წლამდე ასაკის მოსახლეობის მასობრივი აცრების კამპანია ჩატარდა. წინასწარ დაგეგმილი მილიონი ადამიანის ნაცვლად აიცრა მხოლოდ ნახევარი (50,3%), რამაც 2013-2014 წლების ეპიდაფეთქება განაპირობა.

2017 წელს წითელას 94 შემთხვევა დაფიქსირდა. შემთხვევების 13 პროცენტი 1 წლამდე ასაკის ბავშვებში იყო, ხოლო 33 პროცენტი — 14 წელზე უფროსი ასაკის მოსახლეობაში. 2018 წლის მაისის ბოლოსთვის წითელას შემთხვევების რაოდენობამ 864-ს მიაღწია. გარდაიცვალა ორი ადამიანი.