ქუთაისის მერმა, გიორგი ჭიღვარიამ და გორის საკრებულოს თავმჯდომარემ, დავით რაზმაძემ 2019 წლის დადგომა მოქალაქეებს მსგავსი ტექსტებით მიულოცეს. მისალოც ტექსტებს შორის მხოლოდ რამდენიმე სიტყვა იყო განსხვავება, ძირითადი ნაწილი კი სიტყვა-სიტყვით მეორდებოდა.

მაგალითად, გორის საკრებულოს თავმჯდომარის სახელით გავრცელებულ მილოცვაში ვკითხულობთ:

"მე კარგად მესმის, რომ ბევრი ადამიანი ახალ წელს გაჭირვებაში ხვდება! ვისურვებდი, რომ 2019 წელი მათთვის წინსვლისა და გაძლიერების წელი ყოფილიყოს! მე მჯერა, რომ ეს ასეც იქნება! მინდა, ამ ადამიანებს განსაკუთრებულად მივულოცო ახალი წელი!"

იგივე ტექსტი ეწერა ქუთაისის მერის მისალოც სიტყვაშიც.

გორის საკრებულოს თავმჯდომარის მილოცვა 31 დეკემბერს, 15:53 საათზე გამოქვეყნდა, ქუთაისის მერის ტექსტი კი 31 დეკემბერს, 22:20 საათზე. თუმცა, დღეს, 2 იანვარს ქუთაისის მერის მილოცვა რედაქტირებულია და მხოლოდ ორი წინადადება იძებნება.

დავით რაზმაძე რუსთავი 2-თან საუბრისას ამბობს, რომ ტექსტზე 29 და 30 დეკემებერს მუშაობდა და ის მუნიციპალიტეტის საჭიროებებს მოარგო. ქუთაისის მერიის პრესსამსახურში On.ge-ს უთხრეს, რომ კომენტარი მათი პრესსამსახურის თანამშრომლის, დავით ლიკლიკაძის ფეისბუქის სტატუსია. ლიკილიკაძე წერს, რომ მილოცვის ტექსტის შედგენის დროს ნიმუშით იხელმძღვანელა.

"სასწაულ "დანაშაულში" წაგვასწრეს. თურმე, რა მომხდარა, ქუთაისის და გორის მერიას ერთნაირად მიულოცავს ახალი წელი ხალხისთვის... ვისარგებლე [ნიმუშით], რადგან ძალიან მომეწონა ტექსტი, რომელიც მთავრობის პოზიციას კარგად ახმოვანებდა. ჩემი აზრით, დაახლოებით იგივე გააკეთა გორის პიარმაც", — განმარტავს ლიკლიკაძე.