თბილისში, საბავშვო ბაღში პიროტექნიკის გამოყენების გამო 5 წლის ბავშვმა დამწვრობა მიიღო. როგორც On.ge-ს დამწვრობის ცენტრის ექიმმა, გუგა ქაშიბაძემ განუცხადა ბავშვს მარჯვენა ბარძაყი და წვივი ქონდა დამწვარი.

ქაშიბაძის თქმით, ბავშვი ცენტრში 26 დეკემბერს მიიყვანეს, მას მკურნალობა ჩაუტარდა და სახლში გაწერეს. ექიმი ამბობს, რომ ვერ დაადასტურებს იმას, მიიღო თუ არა ამ ბავშვმა დამწვრობა 71-ე საბავშვო ბაღში. მისი თქმით, ამის შესახებ ინფორმაცია ოჯახს არ მიუწოდებია, თუმცა იცის, რომ პაციენტმა დამწვრობა საბავშვო ბაღში მიიღო.

თბილისის, 71-ე საბავშვო ბაღში საახალწლო ზეიმის დროს პიროტექნიკა გამოიყენეს. როგორც ფესბუქზე გავრცელებულ ვიდეოში ჩანს, დარბაზში პიროტექნიკა ფეთქდება და სხვადასხვა მიმართულებით ცეცხლის ალს ისვრის, რასაც ადგილზე მყოფი ბავშვების პანიკა და მშობლების ყვირილი მოსდევს.

როგორც On.ge-ს შინაგან საქმეთა სამინისტროში განუცხადეს, სავარაუდოდ, პიროტექნიკის გამოყენების შედეგად საბავშვო ბაღის ერთ-ერთმა აღსაზრდელმა მსუბუქი დაზიანება მიიღო, მას საავადმყოფოში გაეწია დახმარება და ამჟამად მკურნალობას სახლში განაგრძობს.

საქმეზე გამოძიება სისხლის სამართლის კოდექსის 124-ე მუხლით დაიწყო, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.