საქართველოს პარლამენტის დეპუტატი უმრავლესობიდან ლევან გოგიჩაიშვილი, არც ადასტურებს და არც უარყოფს ინფორმაციას, რომ მისმა კოლეგამ, ეკა ბესელიამ შესაძლოა, კომიტეტის თავმჯდომარის თანამდებობა დატოვოს. გოგიჩაიშვილის კომენტარს საზოგადოებრივი მაუწყებელი ავრცელებს.

"უზენაესი სასამართლოს მოსამართლეობის კანდიდატების სია ჩავარდა, ეს არის იურიდიული კომიტეტის დიდი დამსახურება. კომიტეტის თავმჯდომარეს, ეკა ბესელიას ლომის წილი მიუძღვის. ყველანი ვთანხმდებით, რომ კრიტერიუმები საჭიროა", — აღნიშნა გოგიჩაიშვილმა.

საზოგადოებრივი მაუწყებლის ინფორმაციით, შესაძლოა, იურიდიულ საკითხთა კომიტეტი ეკა ბესელიამ და ვანო ზარდიაშვილმა დატოვონ. სავარაუდო მიზეზი კი იუსტიციის უმაღლესი საბჭოდან პარლამენტში წარდგენილი უზენაესი სასამართლოს მოსამართლეობის კანდიდატების სიის ჩავარდნა იყოს.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

დასახელებულ კანდიდატებს შორის არიან: თამარ ალანია; მერაბ გაბინაშვილი; დიმიტრი გვრიტიშვილი; გიორგი მიქაუტაძე; ნინო სანდოძე; პაატა სილაგაზე; გიორგი ტყავაძე; ნინო ქადაგიძე; მიხეილ ჩინჩალაძე; მარიამ ცისკაძე.

იუსტიციის საბჭოს არამოსამართლე წევრი, ნაზი ჯანეზაშვილი და არასამთავრობო სექტორის ნაწილი მათ "ჩინჩალაძის კლანად" მოიხსენიებს.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი